Ministrja e Arsimit, Shkencës, Teknologjisë dhe Inovacionit, Arbërie Nagavci, ka thënë se janë në proces të ndërtimit të katër çerdheve të reja në Prizren, Mamushë, Deçan e Milloshevë, raporton Ekonomia Online.

Në konferencën javore, Nagavci ka thënë se krahas hapjes së tenderit për këto çerdhe, gjithashtu ka dhënë detaje për ndarjen e 70 bursave.

“Aktualisht i kemi të hapur tenderin për ndërtimin e katër çerdheve në Deçan, Prizren, Mamushë dhe Milloshevë dhe ftoj kompanitë që të ofertojnë për këto projekte. Si Ministri jemi të përkushtuar për ofrimin e kushteve më të mira për fëmijët”.

“Vlera e bursës për nxënës do të jetë 500 euro për 1 vit shkollor, prej tyre 40 në drejtimet deficitare dhe 30 në drejtimet teknike. Në drejtimet deficitare mund të aplikojnë të gjithë nxënësit e IAAP-ve, ndërsa për drejtimet teknike vetëm vajzat”, tha Nagavci.

“Bursat për drejtimet deficitare, janë; Zhvillues i aplikacioneve softuerike, Instalues elektrik, Veterinë, Mekatronikë, Asistent i turizmit dhe udhëtimeve, Përpunimi i drurit/zdrukthtar, Hortikulturë. Ndërsa në bursat për vajza në drejtimet teknike, Metalpunues, Instalues elektrik, Instalues i ngrohjes, klimatizimit dhe ujësjellësit, Automekanik, Teknologjia e reciklimit, Teknik i sistemeve të TIK-ut”.

“Pakon ligjore për përmirësimin e cilësisë në arsim, që ka të bëjë me zhvillimin e mësimdhënësve. Ftoj mësimdhënësit dhe drejtorët që t’i dorëzojnë komentet që do të jenë të hapura deri më 7 qershor”, tha tutje Nagavci.

Po ashtu, ministrja Nagavci përmendi certifikimin e 15 këshilltarëve të parë të karrierës të nivelit të 5-të, ku ftoi komunat që të identifikojnë nevojat për këshilltarë të karrierës dhe të inkuadrojnë mësimdhënësit që kanë mungesë të orëve e të cilët shprehin vullnet për t’u rikualifikuar në këtë program.

Ministrja Nagavci foli edhe për pakon ligjore për sistemin e licensimit të mësimdhënësve, e cila është prezantuar në fillim të këtij muaji, si dhe risitë që sjellin këto Udhëzime, të cilat do të jenë në diskutim publik deri më 7 qershor 2023.

Sa i përket Raportit evropian për Kosovën, ministrja Nagavci tha se ky Raport ka evidentuar suksese dhe mesazhe pozitive për Kosovën, përfshirë edhe në fushën e arsimit, ku është përshëndetur lansimi i Strategjisë së Arsimit 2022-2026, ndarja e bursave për studentët e fushave STEM, marrëveshjet e fundit në kuadër të Procesit të Berlinit për Njohjen e Kualifikimeve të Arsimit të Lartë dhe për Njohjen e Kualifikimeve Profesionale për mjekët, dentistët dhe arkitektët.

Ministrja Nagavci foli edhe për lansimin e programit të përbashkët me Ministrinë e Kulturës “Arti në shkolla”, si dhe ndërtimin dhe përurimin e shkollës “Bajram Curri”, në Krushë të Madhe të Rahovecit në vlerë 1,471,538.31 euro. Ministrja theksoi edhe rëndësinë e bashkëpunimit me prindër në funksion të ngritjes së cilësisë në arsim dhe me këtë rast, ftoi komunat dhe shkollat që të respektojnë të gjitha procedurat e parapara me UA.

Në fund, ministrja foli edhe për Thirrjet për projekte shkencore, ku ndër të tjera përmendi se në thirrjen e fundit kemi pranuar gjithsej 25 aplikime, ndërsa vazhdon të jetë e hapur deri më 25 qershor 2023 thirrja për projekte të përbashkëta kërkimore, tekniko-shkencore mes Shqipërisë dhe Kosovës.