Tri fshatrave të komunë së Podujevës që kanë qenë në karantinë nga 15 marsi, sot u është hequr masa e izolimit.
Për pothuajse një muaj, këto fshatra nuk kanë pasur mundësi të furnizimit të mjaftueshëm dhe ushqime dhe kontrollave shëndetësore. Për këtë arsye, kryetari i degës së PDK-së në Podujevë, Naim Fetahu, u ka bërë thirrje autoriteteve lokale dhe qëndrore që të reagojnë menjëherë në atë zonë.
“Është padyshim lajm i mirë që sot janë hequr masat e izolimit për banorët e fshatrave të Dumnicës dhe Llaushës. Urojmë që të mos kemi më raste të infektuara nga këto vende. Por, ky nuk është aspak moment për të festuar. Përkundrazi, banorët e këtyre dy fshatrave për afro një muaj kanë qëndruar në izolim dhe pa mundësi të furnizimeve adekuate. Komuna dhe Qeveria duhet të reagojnë menjëherë me ndihma konkrete për këta banorë. Në veçanti, të dërgohen menjëherë ekipe mjekësore për kontrollimin e personave me gjendje jo të mirë shëndetësore.”, ka thënë Fetahu.
Më tutje, Fetahu ka bërë të ditur se tashmë është shëruar edhe pacientja e dytë nga kjo zonë. Por, sipas tij, tani qytetarët duhet të kenë kujdes më shumë se asnjëherë, sepse muaji prill pritet të jetë muaji vendimtar.
“Është inkurajuese, po ashtu, shërimi i plotë i pacientes të dytë nga Podujeva. Megjithatë, lufta nuk ka përfunduar dhe armiku nuk është mposhtur. Virusi është ende aktiv në Kosovë dhe po shkon drejt rritjes. Muaji prill është muaji më i rëndësishëm. Ju lutem, qëndroni në shtëpi gjatë këtyre ditëve. Vetëm së bashku dhe duke respektuar vetveten, familjen dhe shoqërinë tonë, do të mund t’ia dalim sa më mirë nga kjo sfidë. Unë kam besim te ju. “, ka përfunduar ai.