Sekretari i Përgjithshëm i NATO-s, Jens Stoltenberg, përsëriti mbështetjen për Ukrainën dhe shpresat e saj për t’u bashkuar me aleancën ushtarake.

Ministrat e Jashtëm nga vendet anëtare të NATO-s i përfunduan takimet dy ditore në Bruksel të mërkurën, duke adresuar mbështetjen për Ukrainën, përgatitjet për samitin e saj në Uashington dhe sfidat e ngutshme të sigurisë.

Në ditën e dytë të mbledhjes së aleancës ushtarake u zhvillua edhe takimi i parë i Këshillit NATO-Ukrainë, ku mori pjesë ministri i jashtëm i Kievit, Dmytro Kuleba.

Ai falënderoi aleatët e NATO-s për mbështetjen e tyre të vazhdueshme, duke shtuar se Ukraina nuk do të tërhiqej në betejën e saj për të rifituar integritetin territorial brenda kufijve të saj “të njohur ndërkombëtarisht” të vitit 1991.

Kuleba theksoi gjithashtu rëndësinë e rritjes së konsiderueshme të prodhimit të armëve, municioneve dhe pajisjeve të tjera ushtarake, jo vetëm për të ndihmuar Ukrainën, por “gjithashtu për të garantuar sigurinë dhe aftësitë mbrojtëse të vetë vendeve të NATO-s”.

“Nuk do të jetë një ekzagjerim të thuhet se të mbrosh Evropën pa Ukrainën është një detyrë e kotë. Ju nuk mund ta bëni këtë, thjesht, për një arsye të thjeshtë, sepse ne aktualisht kemi ushtrinë më të fortë dhe më të ashpër në betejë në Evropë,” tha ai.

Në mbledhje, aleatët e NATO-s u zotuan të “mbesin të palëkundur në angazhimin e tyre për të rritur më tej mbështetjen politike dhe praktike për Ukrainën.

“Ne mbetemi të palëkundur në angazhimin tonë ndaj Ukrainës. Jemi të vendosur që Ukraina një ditë do të ulet në këtë tryezë si një anëtare e plotë e aleancës sonë,” tha Sekretari i Përgjithshëm i NATO-s, Jens Stoltenberg në fjalimin e tij të hapjes.

Për luftën e vazhdueshme, ai tha se Ukraina i kishte shkaktuar humbje të rënda Rusisë dhe ndikimit ndërkombëtar të Moskës, shkruan Reuters, transmeton Klankosova.tv.