Prezantuesi i famshëm, Jerry Springer ka ndërruar jetë në moshën 79-vjeçare.

Nikoqiri i “Jerry Springer Show” ndërroi jetë i qetë në shtëpinë e tij në Çikago të enjten, njoftoi familja e tij.

Moderatori me famë ishte diagnostikuar me kancer pankreatik disa muaj më parë dhe gjendja e tij u përkeqësua këtë javë.

“Aftësia e Jerryt për t’u lidhur me njerëzit ishte në qendër të suksesit të tij në gjithçka që ai u përpoq, qoftë kjo politikë, prezantim apo thjesht shaka me njerëzit në rrugë që donin një foto apo një fjalë”, tha Jene Galvin, një mike dhe zëdhënëse për familjen.

“Ai është i pazëvendësueshëm dhe humbja e tij dhemb pa masë, por kujtimet e intelektit, zemrës dhe humorit të tij do të vazhdojnë të jetojnë”, thuhej tutje në deklaratë.

Përpara se të bëhej një prezantues ikonë televiziv, Springer ishte një politikan që shërbeu në Këshillin Bashkiak të Cincinnati në 1971 dhe u zgjodh si kryetar i qytetit në 1977. Ai shërbeu një mandat.

Springer u përpoq të arrinte në një zyrë më të lartë në 1982, kur u përpoq të kandidonte për nominimin demokrat për guvernator të Ohaios, por përfundimisht humbi.

Pas karrierës së tij politike, Springer u bë prezantues dhe komentator lajmesh në WLWT në qytetin e Ohaios përpara se të merrte një rol të ri si prezantues i ‘talk show’-t në vitin 1991, kur ai lansoi serialin e tij me të njëjtin emër në 1991.

Dalja e fundit e personazhit televiziv në ekran erdhi sezonin e kaluar në “Masked Singer” në të cilën ai performoi si “The Beetle”, duke kënduar një klasik të Frank Sinatra.

Ai la pas vajzën e tij 47-vjeçare, Katie Springer, dhe motrën e tij më të madhe, Evelyn