Delegacioni i Kosovës i udhëhequr nga Besnik Bislimi ai serb i drejtuar nga Petar Petkoviq me ndërmjetësimin e Bashkimit Evropian nisën bisedimet trepalëshe në Bruksel në kuadër të dialogut teknik.

Bisedimeve të sotme trepalëshe i kishin paraprirë takimet dypalëshe të djeshme, fillimisht midis përfaqësuesit të Kosovës dhe përfaqësuesit special të Bashkimit Evropian, Miroslav Lajçak, dhe më pas me delegacionin nga Serbia.

Zëdhënësi për Politikë të Jashtme në Bashkimin Evropian, Peter Stano, tha të hënën për Klankosova.tv se ”në këto bisedime teknike do të diskutohet për çështjet e hapura aktualisht dhe hapat e ardhshëm në dialog”.

Nga qeveria e Kosovës kanë thënë se temë e këtyre takimeve do të jetë edhe çështja e të zhdukurve, njofton Klankosova.tv.

Takimi i nivelit teknik shihet si paraprijës i atij të nivelit të lartë që pritet të ndodhë diku në fillim të vjeshtës.

Kryeministri i Kosovës Albin Kurti dhe presidenti i Serbisë Aleksandar Vuçiq u takuan për herë të fundit më 19 korrik.