Drejtuesit e 45 spitaleve të shtetin jugor amerikan Florida, njoftuan të hënën se nuk kanë më shtretër në dispozicion në njësitë e kujdesit intensiv, ndërsa numri i të infektuarve me koronavirus vazhdon të rritet.

Shteti njoftoi më shumë se 12 mijë raste të reja me koronavirus të dielën, dita e pestë me radhë që raportohen më shumë se 10 mijë raste infeksionesh.

Më e goditura paraqitet veçanërisht zona e Miamit, shkruan VOA.

Kryetari i bashkisë së qytetit të Miamit, Francis Suarez njoftoi se duke filluar nga sot (e hënë) do të vendosen gjoba më të ashpra ndaj kujtdo që nuk vendos maskë në publik. Gjobat sillen nga 50 dollarë në rast të shkeljes së rregullit për herë të parë deri në 500 dollarë për shkelësit përsëritës.

Në Los Anheles, kryetari i Bashkisë Eric Garcetti, tha të dielën se ndodhej në prag të vendimit për lëshimin e një urdhri të ri për qëndrim në shtëpi të banorëve.

Ai kritikoi administratën Trump për atë që ai e quajti mungesë të udhëheqjes se vendit në përpjekjet kundër pandemisë.

Të dielën në rang kombëtar në Shtetet e Bashkuara u shënuan më shumë se 500 vdekje dhe 63 mijë raste të reja me koronavirus.