Do të nisë këtë fundjavë vaksinimi për punonjësit e sistemit të hotelerisë.

Lajmi konfirmohet për Euronews Albania nga Instituti i Shëndetit Publik.

Sipas Kryetarit të Unionit Turistik Shqiptar, Rrahman Kasa në vend ka rreth 40 mijë punonjës vetëm në sistemin e hotelerisë.

Ndërkohë burime për Euronews Albania bëjnë me dije se vaksinimi do kryhet në qendrat e përqendruara të çdo qyteti nisur nga dita e dielë.

Në të gjithë vendin sektori i turizmit ka rreth 93 mijë punonjës.

Deri më tani vendi ynë ka siguruar mbi 2.5 milionë doza vaksinash kundër COVID.

Duke marrë parasysh se nevojiten dy injeksione për person, sasia e dozave të siguruara mund të mbulojë rreth 45% të popullsisë.

Sipas Ministrisë së Shëndetësisë deri më tani në vend janë kryer 281,254 doza të vaksinës kundër Covid-19, duke mos-saktësuar sesa persona kanë marrë një dozë dhe sa të tjerë janë injektuar plotësisht.