Në Klinikën e Ortopedisë, një ekip i mjekëve specialistë, ka kryer për herë të parë me Atroskop një operim në krahun e një pacienti, i cili, për shkak të lëndimeve të shpeshta, i kishte të kufizuara lëvizjet, ndërsa dhembjet i ishin bërë të padurueshme.

Artroskopia është ndërhyrje kirurgjikale. Kjo procedure kryhet me anë të aparatit të Artroskopit, që përdoret për qëllime diagnostikimi dhe trajtimi të problemeve të ndryshme që mund të ketë artikulacioni (nyja).

Klinika e Ortopedisë është pajisur me këtë aparaturë, dy muaj më parë, si një investim nga Ministria e Shëndetësisë dhe SHSKUK , me qëllim të rritjes së cilësisë të shërbimeve për pacientët.

Me të, thotë Drejtori i Ortopedisë, Arben Tolaj, janë kryer intervenime edhe më herët, por në gju. Tash, me metodën minimale invazive, pa e bërë hapjen e nyjës, sipas Tolajt, është kryer një ndërhyrje kirurgjike edhe në krah.

“Është një metodë e re, të cilën po e fusim në përdorim si klinikë dhe besoj që edhe në të ardhmen do të kemi raste të tilla më të shpeshta dhe, në njëfarë forme, ta bëjmë si rutinë”, thotë Tolaj.

Drejtori Tolaj konstaton se pacienti, pas intervenimit, mund ta lëvizë menjëherë krahun. Flet edhe për çmimin e një ndërhyrjeje të tillë jashtë institucioneve publike shëndetësore.

“Nëse do të trajtohej jashtë institucioneve publike, ky lloj operacioni kushton diku 3 mijë euro. Pacienti, menjëherë pas operacionit, fillon me lëvizjen e krahut dhe i jepen këshillat për rehabilitim fizioterapeutik, normalisht, gjithmonë, rehabilitimi bëhet pa dhimbje”, thekson ai.

Për natyrën e komplikuar të lëndimit, flet edhe anesteziologu Agron Rugova, i cili vlerëson se tek pacientët në moshë të shtyrë, veprimet e anestezionit janë më të kufizuara, duke e quajtur sfidë jo të vogël.

“Edhe për neve është pak më specifik, për shkak të moshës që e ka pacientja, është një pacient diku rreth 70 vjeç. Në këtë rast, problemet shëndetësore na kufizojnë veprimin e anestezionit te këta njerëz, e sidomos pozita e saj specifike që duhet të ulet dikur rreth 30 shkallë, domethënë në një pozitë gjysmë të drejtë, të ulur, që duhet gjithmonë pacientin ta përcjellim në aspektin hemodinamik”, thotë Rugova.

 Vasa Gashaj, pacientja e cila është operuar, thotë se nuk ka pritur gjatë për intervenim, po ndihet mirë dhe tash më nuk po ndien dhimbje.

“Mas operacionit, po ndihem më mirë se qysh jam kanë”, thotë Gashaj.