Ministri në detyrë i Punëve të Jashtme i Kosovës, Enver Hoxhaj ka marrë pjesë në ceremoninë e ndarjes së çmimit “Excellence Leadership Award” për diplomatin amerikan William Pope.

Duke e falënderuar për përkrahjen dhe ndihmën e madhe për Kosovën, Hoxhaj e ka vlerësuar Pope si njërin nga diplomatët më të mirë amerikanë, i cili ka dhënë kontribut të çmueshëm në arenën ndërkombëtare, por edhe në procesin e njohjeve të reja për Kosovën.

“William Pope është njëri ndër diplomatët më të mirë amerikanë që ka dhënë kontribut të çmueshëm jo vetëm për çështjet globale, por edhe në përkrahjen e madhe për Kosovën”, ka thënë Hoxhaj.

Ai ka shtuar se Pope është përfaqësimi më i denjë i miqësisë së veçantë që kanë Kosova dhe Amerika, jo vetëm ndërmjet qeverive, por edhe ndërmjet popujve.

Çmimi Excellence Leadership Award iu dha diplomatit Pope nga kolegji UBT.