Autoritetet në Alabama të Shteteve të Bashkuara kanë ekzekutuar një të burgosur me injeksion vdekjeprurës për një vrasje që kishte ndodhur në vitin 1996, pasi Gjykata Supreme i refuzoi pretendimet e avokatëve se i dënuari kishte një të metë mendore.

Matthew Reeves, 43 vjeç, u ekzekutua në burgun “Holman”, pasi Gjykata Supreme e largoi urdhrin e një gjykate më të ulët, me të cilin ndalohej ekzekutimi i këtij personi. Ai u shpall i vdekur në orën 21:24, tha kryeprokurori shtetëror, Steve Marshall.

Reeves ishte shpallur fajtor për vrasjen e Willie Johnson Jr., drejtues automjeti. Sipas dëshmive, Reeves kishte shkuar në një ndejë më pas dhe e kishte festuar vrasjen, shkruan Associated Press, përcjell Gazeta Express.

I dënuari nuk tha ndonjë fjalë të fundit. Guvernatorja e Alabamës, Kay Ivey, përmes një deklarate tha se i vrari Johnson ishte person ndihmues që e kishte shtrirë dorën e ndihmës, por që u vra në mënyrë brutale. Ajo shtoi se dënimi me vdekje për të burgosurin Reeves “është i drejtë, dhe sonte, drejtësia u vu në vend në mënyrën e duhur”.

Zyrtarët e burgut thanë se disa familjarë të të vrarit ishin dëshmitarë gjatë ekzekutimit të të dënuarit.

Reeves ishte shpallur fajtor për vrasjen e kryer më 27 nëntor 1996. Ai ishte vrarë pasi e kishte marrë tashmë të ekzekutuarin dhe disa të tjerë me veturën e tij anash një rruge rurale.

Pasi burrit që po vdiste i ishin vjedhur 360 dollarë, Reeves, atëherë vetëm 18-vjeçar, kishte shkuar në një ndejë, ku kishte vallëzuar dhe i kishte imituar vuajtjet e vdekjes së Johnsonit. Një dëshmitar ka deklaruar se duart e të dënuarit ishin ende me njolla gjaku në ndejë, thuhet në një dokument të gjykatës.