Ligjet e reja që lehtësojnë ardhjen e fuqisë së kualifikuar punëtore në Gjermani, kancelari gjerman, Olaf Scholz i quajti në Bundestag vitin e kaluar “hap tjetër për modernizimin e Gjermanisë, hap tjetër për të siguruar rritjen ekonomike edhe për të ardhmen, dhe një hap tjetër që tejkalon paralizën e disa dekadave”.

Pas miratimit të ligjeve në Bundestag, më në fund hyjnë në fuqi më 1 qershor dy ndryshime ligjore që u miratuan në Gjermani vitin e kaluar, raporton DW.

Kontingjenti nga Ballkani Perëndimor, që vjen me rregullore të lehtësuara në Gjermani, dyfishohet

Nga 1 qershori 2024 zgjerohet Rregullorja e Ballkanit Perëndimor. Kjo rregullore u fut para disa vitesh për të lehtësuar ardhjen e fuqisë punëtore nga vendet e Ballkanit Perëndimor.

Numri i fuqisë punëtore nga Shqipëria, Kosova, Bosnje-Hercegovina, Maqedonia e Veriut, Mali i Zi, Serbia për në Gjermani do të zgjerohet tani nga 25.000 në 50.000 vetë në vit.

Më 1 qershor po ashtu hyn në fuqi Karta e Shanseve

Me këtë kartë të huajt nga vendet jo anëtare të BE kanë mundësi të udhëtojnë në Gjermani për të kërkuar punë, edhe pa pasur kontratë pune. Për marrjen e Kartës së Shanseve duhen mbledhur pikë: ka disa kriteret për marrjen e pikëve, aty llogaritet njohja bazë e gjuhës gjermane apo njohja e mirë e gjuhës angleze, kualifikimet, përvoja profesionale, të paktën dy vjet apo një shkollim i lartë profesional në vendin origjinë.