Kosovarja, që kishte shkuar në ShBA gjatë luftës, udhëhoqi pjesën klinike të studimit më të ri në ShBA, që ofroi provat më bindëse për efektin e terapisë anti-virale ndaj COVID-it.

Ky studim, më i riu dhe më i besueshmi përkrah organizimi, struktura dhe numri i pacientëve, që trajtoi efektin e Remdesivirit, u publikua të mërkuren. Ai u sponzorua nga Instituti Nacional për Alergji dhe Sëmundje Infektive (NIAID), pjesë e Instituteve Nacionale të Shëndetësisë të SHBA (NIH). E aspekti farmaceutik i tij u drejtua nga Dr. Zana Blaku-Tanushi, me origjinë nga Prishtina, raporton “illyriapress”.

Blaku-Tanushi punon si farmaciste klinike në fushën e kërkimeve shkencore në mjekësi, në qendrën klinike të Institutit Nacional të Shëndetësisë (NIH).

Sipas saj, edhe pse rezultatet janë ende preliminare dhe duhet të bëhet analizë e plotë e të gjitha të dhënave, ky është një hap premtues, transmeton KOHA.

Studimi nisi më 21 shkurt dhe përfshiu 1063 në 68 vende në SHBA, Evropë dhe Azi. Bordi monitorues i sigurisë dhe provave gjatë studimit ka informuar hulumtuesit më 27 prill se remdesiviri ishte më i mirë sesa placebo.