Dikujt po i kruhet , dikujt po i luhet : Mund edhe të mos pajtoheni me vlerësimin tim por , definitivisht kemi politikanë jashtëzakonisht inteligjent , të lexuar , të besës , të fjalës , me një integritet të lartë moral , profesional e sidomos material ! Po i shohim zhvillimet e fundit rreth taksës 100 % për mallrat nga Serbia dhe Bosnja , dy shtete skajshmërisht armiqësore ndaj Kosovës . Këtë armiqësi , jo që nuk e fshehin por krenohen me te. E keni parë Malli Sllobën ( Sllobën Picimul ) Ivica Daçiq duke u krenuar me ç’njohjet që e bëjnë disa shtete e se këtë e bëjnë duke u mbështetur në argumentet e Serbisë ! Gjithashtu , ky Picimul krenohet edhe me bllokadat që ia bënë Serbia Kosovës dhe për këtë nuk më kujtohet të kenë reaguar dyshi mashtrues , Frederika Mogerini dhe Johanes Han sikur as edhe një ambasadë e vetme në Beograd apo Prishtinë .

Po të kishte Kosova politikaj që e respektojnë minimumin e krenarisë kombëtare dhe sakrificën e bërë më shumë se 100 vjet , Serbia nuk do të ishte fare e pranishme në Kosovë . Po të mos i hapnin shalët në Rambuje duke pranuar çdo gjë që iu ishte ofruar , nuk do të ishte Marrëveshja Tekniko – Ushtarake në Kumanovë ku shqiptarët dhe Kosova u futën në senduiç midis ndërkombëtarëve dhe Serbisë dhe u shkërdhyen mirë e mirë , pa pasur aspak çasje në fatin që ia shkruan të tjerët . Disa nga këta pehlivanë hajdutë luajtën keq me gjakun e derdhur duke u shndërruar në milionerë dhe duke ua zëvendësuar armët e gjata TMK – së , gjithashtu me “ armë të gjata “ , kazma dhe lopata ! Lëshimet ishin zingjirore , deri në ditët tona ; gjatë bisedimeve të Vjenës , Pakoja e kriminelit kushtetues Marti Ahtisari , 6 pikat e Sllobodan Samarxhiqit të përkthyera në 6 pikat e Ban ki Munit , organizimi i zgjedhjeve të Serbisë në Kosovë nën përkujdesje të OSBE –së , mosndjekja dhe mosndëshkimi i krimeve serbe në Kosovë , formimi , mirëmbajtja  dhe forcimi i strukturave paralele të Serbisë në Kosovë , injorimi dhe mohimi i institucioeneve të Kosovës në vendet ku jetonin serbët , ndarja  e qytetit të Mitrovicës në dy pjesë 18 vite pas përfundimit të luftës , vrasja e qytetarëve joserbë dhe dëbimi i dhunshëm i më shumë se 13,000 mijë shqiptarëve dhe joserbëve nga veriu i Kosovës  , lirimi nga burgu i Mitrovicës të 22 të dyshuarve për krime lufte e që pastaj , disa shkuan në Serbi kurse disa iu bashkuan organizatës kriminale “ Rojat e Urës “ dhe grupeve tjera kriminale , deri te vrasja e policëve të Policisë së Kosovës sikur edhe vënia e zjarrit pikave doganore në Jarinje dhe Bërrnjak , ditën e shpalljes së pavarësisë së Kosovës . Serbët , për më shumë se 18 vite nuk paguan për rrymën e shpenzuar kurse hajnat ndërkombëtarë dhe vendorë këto shpenzime ua faturuan shqiptarëve duke i plaçkitur për aq kohë dhe vazhdojnë t’i plaçkisin edhe sot e kësaj dite . Kosovës iu imponuan bisedimet e pabarabarta nga të cilat doli fitues vetëm Serbia dhe një grup skajshmërisht i kriminalizuar i politikanëve vendorë. Po të mos ishte një atdhetar shembullorë dhe sakrifikues , i dijshëm përtej standardeve shqiptare dhe kosovare , mik i ngushtë i dy njerëzve më të fuqishëm në botë , Putinit dhe Trampit , siç është Behgjet Pacolli , Daçiqi do ta vazhdonte plojën mbi diplomacinë kosovare por , Begja , së bashku me bashkëpatriotët Dardan Gashi , Shpend Ahmeti , Enver Hoxhaj u vënë si mur i gjallë para eskadronit pushkatues të Serbisë dhe , ende janë gjallë ! Madje , të përparuar në karrierë. Po të më ipnin edhe 10 milionë euro të bëjë ranglistën se cili prej tyre është më patriot , më sakrifikues , më i dijshëm , më i ndershëm , më pakurrizorë , sigurisht se do ta humbja bastin , e kam të pamundur ta bëjë ndarjen dhe renditjen . Mirëpo , fati i përcjellë të guximshmit dhe në skenë dolën dy patriotë dhe trima të jashtëzakonshëm , Enver Hoxhaj dhe Endrit Shala ( me shaljanë nuk ka mahi  nëse e kujtoni këngën për shtatë shaljanë sikur edhe me hoxhallarët e Therandës nëse i referohemi këngës , Enver Hoxhaj e mbrehu shpatën – taksën 100% ) që ia futën taksën 100% për mallrat nga Serbia e Malli Sllobës dhe Srpska Krajina e Dodigut . Thuaja u bë kijameti dhe pas kësaj filluan presionet e mëdha ndaj qeverisë së Kosovës dhe Ramush Haradinaj ta heqë këtë taksë . Më të zëshmit ishin lobistët e Serbisë në BE –e , Frederika Mogerini dhe Johanes Han . Vuçiqi , i dalë nga sperma politike dhe shoviniste e Sheshelit , tërë ditën rri me mindilë në dorë para të huajve duke u ankuar se serbët në Kosovë dhe aleatët e tyre si puna e disa tajkunëve kosovarë që flasin shqip , po vdesin urie dhe nga sëmundjet për shkak të mungesave të barërave . Donald Tramp , presidenti amerikan , shok i ngushtë i Behgjet Pacollit , mentorit politik dhe sidomos ekonomik i presidentit Thaçi i dërgoi një letër Hashim Thaçit e cila , sipas meje është shumë e keqe dhe shumë e dëmshme për Kosovën dhe shumë e mirë dhe shumë e dobishme për Serbinë .  Dje e dëgjova përmes Radio Dukagjinit një pjesë të letrës apo përgjigje që ia kishin dërguar presidentit Tramp . Nga ajo pak që e dëgjova , fitova përshtypje , dhe jo vetëm përshtypje por një siguri të madhe  se atë përgjigje e kishe dërguar , Aleksandar Vuçiq , presidenti çetnik i Serbisë. Më vonë e dëgjova përsëri leximin e kësaj letre dhe u ndala te një fjalë që , përveç Hashim Thaçit dhe Papë Françeskut , nuk e kupton askush, fjalën celebrim. Realisht , nga aspekti i rimës disi edhe përputhet por , Hashim dhe celebrim nuk shkonë nga perspektiva euroatlantike . Pastaj , pata mundësinë ta lexoj letrën në tërësi dhe 100% jam i sigurt se nuk e ka shkruar presidenti Thaçi atë letër. Ajo letër është krejtësisht pakurrizore , me fleksibilitet deri në lëvyrje . Prandaj , duke e njohur presidentin Thaçi si personalitet me integritet të lartë njerëzorë , kombëtar , moral dhe politik , ai , kurrë dhe në asnjë rrethanë nuk do ta shkruante atë letër . Mund të jetë firma e presidentit Thaçi mirëpo nënshkrimi edhe mund të klonohet . Kurrë Hashim Thaçi nuk do ta shkruante këtë letër ! Madje , po të mos përmendej në atë letër Kosova , titulli i presidentit dhe do gjëra identifikuese , kisha menduar se kjo letër është dërguar nga ato që më parë i kanë ofruar shërbime orale dhe gjeostrategjike presidentit Tramp dhe faturat , në kesh i ka paguar avokati i Trampit. Jo , jo , Hashimi nuk lëshohet në këso lojëra anipse e ka një kotillë politike shoqëruese dhe shërbyese të përbërë nga prostitutat politike dhe morale ! Po të mos  e lexoja këtë letër prostituimi , nuk do t’u besoja veshëve për faktin se dëgjimin ma kanë marrë , si trofe , paraardhësit biologjikë , politik , kombëtar dhe njerëzorë të disa këshilltarëve të Hashimit , Kadrisë , Ramushit dhe bartësve të pozitave të larta tjera , në burgjet dhe llogoret e Sarajevës , Foçës , Mostarit , Zagrebit , Rijekës , Lepogllavës ,  Gospiqit , Stara Gradishkës  , Sllavonska Pozhegës dhe qendrave tjera “ rehabilituese “ ku shëroheshin dhe trajtoheshin armiqtë e Jugosllavisë dhe bashkim – vëllazërimit apo , shqiptarët , si puna ime. Po deklarohem publikisht se edhe me  mend nuk jam fort mirë prandaj nuk marrë përgjegjësi për shkrimet e mia. Jam fare i papërgjegjshëm , para ligjit , robit dhe Zotit ! Prandaj , kurrë nuk bëra karrierë politike , nuk më bënë deputet , ministër apo zëvendësministër e lëre më ambasador ose kryetar i naj bordi. Një herë më pyetën nëse do të pranoja të bëhem shef , SHEF , i ndërrimit të trenave në Fushë Kosovë dhe , pasi , me përulësi pranove më kërkuan kualifikimin shkollor dhe profesional dhe kur iu tregova se statusi im shkollor është shkollë e mesme e përfunduar dhe student i përjetshëm , gati se nuk më futën nën një tren që udhëtonte për Mitrovicën e Goran Rakiqit. Nuk e ulim thanë nivelin sepse , filan komandanti ka mbaruar magjistarturën për menaxhim të biznesit , tjetri është doktor i marëdhënieve ndërkombëtare, Shkurta , anipse është dashnore e Llullës e ka përfunduar fakultetin e shkathtësive orale me notën mesatare 10.23 . Definitivish jam i pafatë , e pranoj !

A të hiqet taksa a po rrëzohet kasta : Ashtu siç e kam idol Behgjet Pacollin për patriotizëm , Dardan Gashin për ndershmëri , pas vdekjes së Hajdar Shtimes , idol dhe ideal për guxim e kam Enver Hoxhajn . Sidomos kur u bë publik fakti se ai , e jo Ramush Haradinaj ishte baba i taksës 100%  për mallrat nga Serbia dhe Bosnja . Me këtë krenohej , me shumë të drejtë , vet Enveri , partia , Kosova dhe krejt shqiptaria. Enveri shkoi edhe më tej , tha se kemi edhe masa tjera ndaj Serbisë. Me Enverin krenohej edhe kryetari i partisë , zoti Veseli , presidenti Hashim Thaçi dhe krejt PDK , me degë , nëndegë , arterie , kapilare , granim , burrnim , të rinj , fëmijë , faqezi dhe axhami . Madje, më kanë thënë por se nuk e kam dëgjuar me veshët e mi se para çdo takimi të rëndësishëm të PDK –së e sidomos Drupit Parlamentar , në vend të himnit Kosovar të kompozitores  së talentuar dhe të mirënjohur Tina Kajdanov , ose atij kombëtar që dëgjohej shumë rrallë , thuaja u përditësua himini i ri i PDK-së,  kënga : “ Enver Hoxhaj , o , e mbrehu shpatën , edhe një herë o për situatën….” Po kjo këngë mbeti në top- lista deri sa ambasadori amerikan në Prishtinë nuk e solli një këngë tjetër në zyrat e shokut Enver !  Kjo kënga e ambasadorit amerikan nuk ishte tamam këngë argëtuese apo Odë Trimërie por një marsh funebër për taksën 100% të shokut Enver ! Partia e shokut Enver e ka bërë gati ekipin pregatitor për varrimin e taksës 100% e me këtë edhe varrimin politik të Ramushit. Me një fjalë , u bë puna skllotë , në mos edhe më keq ! Kur shoku Enver e mbronte të drejtën e autorit për taksën 100% , para se ta hapte gojën , është dashur ta rrudhte apo ta mbyllte prapanicën dhe , në këtë rast , po të vepronte kështu  nuk do të vinte në situatë që është sot , e ka mbyllë krejtësisht gojën ndërsa e ka hapur krejtësisht prapanicën !

Po çka nëse bjen qeveria dhe shkohet në zgjedhje : Nëse taksa pezullohet për 120 ditë , nuk ka nevojë më të kthehet kurrë . Pas kësaj që po ndodhë , edhe nëse në Kosovë hyjnë mallrat nga Serbia , duhet të jeni pa asnjë skrupull moral dhe ndjeshmëri njerëzore nëse i blini ato mallra. Nëse Serbia e kushtëzon vazhdimin e bisedimeve me heqjen e taksës 100% dhe ky kushtëzim pranohet nga bashkësia ndërkombëtare atëherë Ramush Haradinaj duhet menjëherë ta heq taksën 100% dhe vazhdimin e bisedimeve ta kushtëzojë me ndriçimin e fatit të personave të pagjetur . Nuk e besoj se bashkësia ndërkombëtare e kundërshton këtë kushtëzim aq më parë që në mesin e të zhdukurve ka , përveç shqiptarëve që janë shumicë , edhe serbë , romë , boshnjak etj. Ose nuk duhet të ketë kushtëzime fare , ose kushtëzimet duhet të vlejnë për të dyja palët ; shqiptare dhe serbe !

Njeriu i fundit që është i interesuar për zgjedhje të parakohshme është presidenti Hashim Thaçi . Po të ishte interes i tij për të shkuar në zgjedhje , do të ishte harruar kjo temë . Në rast të zgjedhjeve të parakohshme , humbësit më të mëdhenj do të ishin Hashim Thaçi , presidenti aktual i PDK –së dhe PDK , me të cilën askush nuk do të pranonte në bënte koalicion , nëse e vazhdon lojën e taksës. Madje , as AKR , si fuqi dominante politike në Kosovë nuk do të bashkohej me PDK-në . Për Dardan Gashin nuk jam fort i sigurt , mbase edhe do ta forconte PDK-në. Në jetën e përditshme , qoftë edhe në përpjekje të bërit politikë , duhet ta ruani një minimum të moralit njerëzorë dhe të korrektësisë , nëse doni të bashkëpunoni me dikend. Nëse zgjedhjet do të mbaheshin në 60 ditët e ardhshme , fitues do të dilte , ndonëse nuk e meriton me asgjë , LDK. Për vend të dytë LVV nuk do të rrezikohej kurse , për vend të tretë do të bënin garë AAK dhe PDK. PSD dhe Nisma , me shumë mund do ta kalonin pragun kurse AKR , do të përfundonte në shportën e mbeturinave joekologjike ( të pa ricikliueshme ) , sikur edhe Alternativa për Gjakovën !

Koalicionet e mundshme dhe të pamundshme : Koalicioni i paralajmëruar midis LDK –së dhe LVV e që nuk kanë asgjë të përbashkët , përveç oreksit obez për pushtet edhe mund të ndoshë . Këtij koalicioni do t’i bashkohej  , pas divorcit eventual për shkak të tradhëtisë bashkëshortore ( koalicionit parazgjedhor ) edhe AAK-ë që, për mendimin tim  do të ketë rritje për 5%, si dhe Nisma , Alternativa dhe AKR . Me gjasë , PDK , do ta pësonte fatin e Robinson Krusos , e vetmuar në opozitë duke pritur dekompozimin politik , thuaja të pashmangshëm. Ky koalicion do të fitonte prej 65 -70 deputetë dhe me pakicat ose ndonjë deputetë të pavarur do të merrte çdo vendim. Po të ndodhte ky skenar , atëherë edhe Thaçi do t’i bashkohej Robinson Krusos , si i detronizuar dhe pa imunitet ! Nuk po e them si do të zhvillohet ky detronizim i Thaçit shkaku se nuk po dihet kur mbahen zgjedhjet . Kështu i shoh gjërat dhe nuk kam asnjë përputhshmëri me parashikimet e Ramush Tahirit !

Ekipi “ Shtetëror “ Negociator : Herën e  parë u takuan me Mogerinin dhe përcjellëset e saj. Herën e dytë u takuan me këshilltarët e Mogerinit . Herën e tretë do të takohen me shoferin e Mogerinit në hyrje të godinës , pa i lënë të futen brenda , Nëse këmbëngulin që të takohen edhe pas kësaj me Mogerinin , mashtruesja nga Brukseli do ta thërrasë policinë belge e cila do t’i deportojë për në Kosovë , sikur të ishin gylenistë ! Nuk mbaj kurrfarë përgjegjësie për ate që kam shkruar deri më tani !

Disa arsimtarëve parashkollorë , jo që nuk duhet t’u rriten rrogat por duhet të penalizohen me heqjen e saj : SBASHK –u , me kamikazin që e ruan veten por i dëmton të tjerët , kryesisht fëmijë , Rrahman Jasharaj , po kërkon , jo rritje të rrogave por rritje të vlerës së koeficientit për ta përdorur për shkaqe estetike . Demagog i madh është Rraha . Mirëpo , disa mësuesve dhe mësueseve që ua kanë mësuar shkrim – leximin deputetëve të sotit , jo që nuk duhet rritur rroga por duhet të penalizohen . E kuptoj se e kanë pasur vështirë t’i mësojnë të shkruajnë sepse alfabeti i gjuhës shqipe ka shumë shkronja dhe një sintaksë të ndërlikuar , mirëpo , si nuk i kanë mësuar të lexojnë tekstet që ua kanë shkruar të tjerët . Fort turp!

Jam me fat që shkrimet e mia i boton Epoka e Re dhe jo Koha Ditore , ndryshe , për shkak të taksës dhe letrës së Tramp-it që e konsideroj të rrezikshme dhe të dëmshme për Kosovën , do të ikja për lesh , siç thonë në Tepelenë. Besoj shumë se as presidenti nuk i lexon shkrimet e mia prandaj ende jam në këmbë dhe jo në listën e Bushit . Për mua nuk paraqet problem taksa 100% por marrëveshja e dhimbshme dhe vullneti i shprehur i Hashimit për kompromis me Serbinë ! Nuk po e kuptojnë se nuk është me rëndësi a e zbatoni menjëherë një marrëveshje ndërkombëtare por a e nënshkruani ate , qoftë edhe shumë të dëmshme . Nëse e merrni një detyrim ndërkombëtarë , në formë të marrëveshjes së nënshkruar , përralla dhe mashtrim janë votat e 2/3 të deputetëve për t’u  ratifikuar apo sovrani përmes referendumit . Nëse kjo legjislaturë nuk e ratifikon , do ta ratifikojë një përbërje tjetër e Kuvendit . Kjo është si puna e kredisë , sa më shumë të mos e paguani detyrimin , përmbaruesin do ta keni te dera !

Nuk besoj në miqësi të pëprjetshme apo dashuri në politikë . Politika është interes dhe vetëm interes. Nuk e kuptoj si mund ta dojë Kadria më shumë Trampin , se Ramushin . Dhe t’i besojë më shumë ndërkombëtarëve se tuajve . Duan të na mashtrojnë. Na duan si të dëgjueshëm dhe të nënshtruar pa asnjë kusht e jo si partnerë. Na duan me brekë të lëshuara . Duan ta marrin Leposaviqin , Zubin Potokun dhe Zveçanin , duan që Gazivodën ta fusin në një administrim ndërkombëtar për ta ulur mllefin dhe revoltën sikur që edhe Trepçën ta lënë në pat pozicion . Duan që Veriun ta spastrojnë nga shqiptarët , që disa fshtara të Luginës t’i bashkojnë me Kosovën pas së cilave nuk do të kishte më shqiptarë në Kosovë , duan që bashkësinë e komunave serbe , me kryeqytet Mitrovicën e Veriut ta veshin me komptetenca ekzekutive sikur edhe që pronat dhe statusin e kishës ortodokse ta bëjnë kategori kushtetuese në Kosovë. Duan ta spastrojnë Serbinë nga shqiptarët kurse pjesën e madhe të serbëve të Kosovës ta lënë në Kosovë , që faktikisht edhe është dhe ta lënë një element të përhershëm destabilizues të Serbisë në Kosovë të cilët do të mbrohen nga Kushtetuta e Kosovëps dhe do të paguheshin nga buxheti i Kosovës .

Me Marrëveshjen  e Prespës që u përkrah nga politikanët e kriminalizuar dhe të korruptuar shqiptarë në Maqedoninë e Veriut , shtetësia e Maqedonisë së Veriut u betonua , me armaturë të NATO-së , kurse shqiptarët përfundimisht e humbën rastin të bëhen popull shtet-formues në këtë shtet. Plus , me këtë vetvrasje politike të politikanëve të kriminalizuar dhe të korruptuar shqiptarë në Maqedoni të Veriut , pasi u neutralizuan Lugina dhe shqiptarët në Mal të Zi , Kosova do të trajtohej si rast i izoluar siç edhe donin ndërkombëtarët , pa pasur mundësi të prodhimit të efektit domino në shtetet ku jetojnë shqiptarët. Në këtë rast , Kosova po hynë në krizë të madhe , burgjet do të mbushen plotë. Madje më shumë se në Jugosllavinë e Titos dhe të Millosheviqit !