Numri i viktimave nga coronavirusi në Spanjë ka shkuar në 491, raportojnë zyrtarët shëndetësorë, që do të thotë se për një ditë ndërruan jetë 182 persona.

Sipas mediave të huaja, numri i rasteve u rrit nga 2,000 në 11,178, ndërsa Spanja mbylli kufijtë e saj, dhe mobilizoi një bllokim të pjesshëm për 47 milionë banorë.

Numri i të vdekurve nga coronavirusi është rritur po ashtu në Iran, duke raportuar 135 të tjerë, ndërsa numri i përgjithshëm ka shkuar afër 1,000.

BE planifikon të paraqesë planin 30-ditor për të anuluar të gjitha udhëtimet jo thelbësore, ndërsa Franca filloi bllokimin e saj të “rreptë”.

Ndërkohë udhëheqësit e BE-së do të diskutojnë masat përmes videokonferencës më vonë të martën, ndërsa Euro 2020 është shtyrë për një vit.

Bëhet e ditur se qytetarët francezë gjatë këtij bllokimi, nuk mund të dalin nga shtëpia pa posedimin e së paku një dokumenti ku detajohen arsyet, pasi mund të gjobiten për shkelje.

Në Britani të Madhe tashmë është marrë vendim të shmangin kontaktin shoqëror, të punojnë nga shtëpia, si dhe të anulojnë udhëtimet jo thelbësore,

Kujtojmë se coronavirusi është shpallur pandemi globale, ndërsa ka prekur 173 mijë persona në të gjithë botën dhe 7,000 të tjerë kanë ndërruar jetë.