Një nxënës i një shkolle të mesme të ulët nga Deçani i ka vënë në siklet disa deputetë të Kuvendit të Kosovës, gjatë një takimi sot në ndërtesën e Kuvendit.

Një grup i nxënësve të shkollës “Lidhja e Prizrenit” nga Deçani kanë ardhur sot në Prishtinë për të aplikuar për vizë britanike për një vizitë që do t’ia bëjnë ishullit meqë janë përzgjedhur si nxënësit më të mirë të komunës.

Kuvendi i Kosovës u ka hapur këtyre nxënësve për të marrë pjesë në një mbledhje të Komisionit Parlamentar për Administratë Publike e Media.

Nënkryetarja e këtij Komisioni, Xhevahire Izmaku (PDK), u foli nxënësve për mundësinë që ata kanë për ta vizituar institucionin që i bën ligjet e vendit, mundësi të cilën ajo tha se nuk e ka pasur kur ka qenë në moshën e vizitorëve të vegjël.

“Në moshën e juaj s’kam pasur mundësi të vizitoj Kuvendin për shkak te situatës tjetër. E kam një mesazh: mësoni, zhvillonu, mos e keni synim me qenë politikanë”, tha Izmaku.

Arban Abrashi nga LDK u uroi sukses nxënësve në turin e tyre në Angli.

“Keni me qenë pasqyre e jonë atje, shfrtyëzojeni në maksimum dhe ato të mira qe keni me i marrë atje, me i sjellë në Kosovë e Deçan”, tha Abrashi.

Ndërkaq Milaim Zeka nga NISMA i porositi ata që të qëndrojnë vetvetja.

“Unë po ju them vetë një gjë, rrini vetvetja, mos ndryshoni për askënd, as tash as kur të rriteni. Mos e ndryshoni mendimin as për familjarë, as për politikanë as për askënd. Ju lutem mos u bëni si ne”, tha ai.

Por njëri nga nxënësit nuk u impresionua nga mundësia për ta vizituar Kuvendin apo lëvdatat që morën nga deputetët.

Halli i tij ishte lajmi që presin shumica e kosovarëve për liberalizim të vizave, çështje e cila është në duar të deputetëve.

“E kam një pyetje të drejtpërdrejtë, a është afër liberalizimi i vizave, sepse e dimë qe ka komplikime në marrjen e vizave e deshtëm me ditë”, tha njëri nga nxënësit.

“Mos na shti në këto ujëra”, ishte përgjigja e shkurtër e kryetarit të Komisionit, Nait Hasani, deputet i PDK-së.