Presidenti i Federatës së Futbollit të Kosovës, Agim Ademi, ka pritur sot në selinë e tij ambasadorin e Britanisë së Madhe në Kosovë, Ruiari O’Connell me stafin e tij.

Në këtë takim ishin të pranishëm edhe anëtarja e Komitetit Ekzekutiv të Federatës, Vjollcë Krasniqi, sekretari i përgjithshëm, Eroll Salihu, zëvendëssekretari Arianit Ahmeti dhe drejtuesit e grupit të tifozëve “Dardanët”.

Fillimisht presidenti Ademi falënderoj ambasadorin  O’Connell për mbështetjen që i ka dhënë Kosovës, ai personalisht, por edhe Britania e Madhe në të gjitha aspektet, e veçmas për përkrahjen e dhënë Kombëtares së Kosovës në çdo ndeshje që ka luajtur në stadiumin ‘Fadil Vokrri’.

Ndërkaq,  diplomati britanik  i përgëzoi drejtuesit e FFK-së për punën e deritashme dhe për sukseset e arritura jo vetëm me Kombëtaren A, por edhe me ekipet e tjera të grupmoshave, pastaj për organizimin fantastik të ndeshjeve dhe për sjelljen e shkëlqyeshme të tifozëve.

Tutje O’Connell e ka vlerësuar si storie të suksesit FFK-në, duke uruar që rezultatet pozitive të Kombëtares, por edhe klubeve do të vazhdojnë edhe në të ardhmen, teksa ka premtuar se gjithmonë do të jetë afër Kombëtares së Kosovës, pasi tashmë edhe djali i tij është bërë një fans i madh i Dardanëve.

Gjatë këtij takimi u bisedua edhe për çështjen e vizave dhe për lehtësimin e procedurave për tifozët dhe stafin për shkuarje në ndeshjet e muajit shtator në Angli. Gjithashtu temë bisede ishte edhe ndeshja e kthimit në muajin nëntor kundër Anglisë, e ku të dyja palët vlerësuan se është një rast shumë i mirë i promovimit të kulturës dhe mikpritjes sonë për tifozët anglezë.

U diskutua edhe për organizimin sa më të mirë të ndeshjeve të klubeve në rast se Feronikeli dhe Prishtina kalojnë në rrethin tjetër të garave evropiane, me ç’rast do të takoheshin me klubet britanike, TNS dhe Glasgow Rangers.

Edhe për këtë çështje ambasadori u shpreh i gatshëm të ndihmojë në lehtësimin e procedurave për pajisje me viza, si dhe njëherësh kërkoi që të bëhet një organizim sa më i mirë edhe nga klubet dhe autoritetet lokale që mikpritja për tifozët të jetë në nivelin më të mirë.

Në fund, presidenti Ademi dhuroi një plaketë dhe një fanellë të Kombëtares për ambasadorin O’Connell, derisa dhuratë për ambasadorin kishte përgatitur edhe kryetari i “Dardanëve”, Lulzim Berisha, për çka ambasadori u shpreh tejet falënderues.