Drejtori Ekzekutiv i Klubit të Prodhuesve, Astrit Panxha, në një intervistë për Ekonomia Online ka thënë se vonesat nga implementimi i pakos së parë për rimëkëmbje ekonomike ka shkaktuar vështirësi në biznese dhe operimin e tyre.

Madje kjo gjë, sipas tij, është dashur që grandet emergjente t’i shpërndahen një numri të madh të kompanive sidomos sektorit të gastronomisë.

“Pakoja e parë ka pasur një impakt të themi modest sepse më së pari nuk është implementuar menjëherë dhe kjo vonesë ka shkaktuar vështirësi në bizneset dhe operimin e tyre. Pakoja e dytë sidomos masat që janë ndërmarrë nga qeveria është janë të mirëseardhura sidomos ky transferi 60 milion euro të bizneset i ka dhënë një hapësirë për frymëmarrje por nuk është i mjaftueshme dhe duhet sa më shpejt të miratohet ligji për rimëkëmbje ekonomike pastaj duhet një periudhë shtesë që ky ligj të bëhet operacional. Kështu që edhe nëse kalon sot ligji për rimëkëmbje ekonomike nuk besoj që do të jetë i operacionalizuar deri në fillim të vitit të ardhshëm”.

Sipas tij, sektorin i prodhimit ka nevojë për grante për rritjen e kapaciteteve prodhuese.

“Tash ne kemi subvencionim që qeveria ka dhënë në forme 290 euro për punëtorë dhe në të kaluarën ka ndarë subvencione për familjet me asistencë sociale apo për grante. Tash janë disa mënyra që të asistohen kompanitë sa i përket granteve. Është granti emergjent që është dashur t’i jepen një numri të madh të kompanive sidomos në sektorin e gastronomisë. Ky grant emergjent do të jetë pa kthim ku do ti jepet një shumë e caktuar ku së paku obligimet që i kanë gastronomia ti paguajnë dhe pastaj të fillojnë të operojnë. Kemi sektorin e prodhimit që kanë nevojë për grante për rritjen e kapaciteteve prodhuese, si blerjen e makinerisë së re. Grantetet mund të sistemohen në atë forme që janë gjithëpërfshirëse”, shtoi ai.

Teksa ka folur për rekomandimet që i kanë dhënë Qeverisë për ndryshimin e ligjit, Panxha tha se gjatë takimit me kryeministrin Avdullah Hoti do të diskutojnë disa prej këtyre pikave.

“Ne i kemi dhënë disa rekomandime Qeverisë, njëri prej tyre është të ndryshohet ligji i prokurimit publik ku i jepet përparësi prodhuesve gjatë aplikimit për tendera. Kemi mbi 700 milion euro që janë shpërndarë shpenzimet kapitale nga qeveria. Këto mjete në qoftë se mbesin në Kosovë atëherë rritet prodhimi, punësimi dhe rritet qarkullimi brenda ekonomisë. Ne kemi kërkuar që kush ka blerë produkte vendore të mos paguajë TVSH. Këtë javë kemi takim me kryeministrin Hoti dhe do ti diskutojmë disa nga këto pika. Pastaj është edhe subvencionimi i eksportit duke larguar tatimin”.

Ai theksoi se niveli i lartë i korrupsionit po shtyn investitorët të mosinvestojnë në Kosovë, raporton EO.

“Nuk kemi nevojë për të shkuar në Kinë dhe Vietnam ose vende të tjera. Kemi fuqi punëtore që lehtë trajnohet dhe tregu është i afërt prandaj duhet të investohet në Kosovë. Ne bazën tatimore e kemi shumë të ulët. Nuk kemi siguri politike dhe juridike sepse lufta politike shpesh bëhet në dëm të ekonomisë por në të njëjtën kohë kemi nivel të lartë të korrupsionit që janë dy pengesa kryesore që i shtyn investitorët të hezitojnë të investojnë në Kosovë”.

Sipas Panxhës, ekonomisë i nevojitet një implementim më afatgjatë i politikave zhvillimore.

Ai tha se partitë politike mendojnë për vota dhe jo për vende të punës, andaj sipas tij, kjo ndikon edhe në uljen e investimeve të huaja direkte në Kosovë sepse askush nuk do të investojë në një vend ku nuk ka stabilitet politik.

“Kur nuk kemi stabilitet politik atëherë kjo reflektohet në shumicën e sferave të jetës e veçanërisht në ekonomi. Ekonomisë i nevojitet një implementim më afatgjatë i politikave zhvillimore dhe politikave të tjera stimuluese për ekonominë që për fat të keq tek ne nuk ka ndodhur. Shpesh partitë politike mendojnë për kapitalin politik ndërsa jo për kapitalin ekonomik. Mendojnë për vota por jo për vende të punës. Kjo ndikon edhe në uljen e investimeve të huaja direkte në Kosovë sepse askush nuk do të investojë në një vend ku nuk ka stabilitet politik”, shtoi Panxha.

Madje ai shtoi se sektori i ushqimi dhe përpunimi i drurit janë më të goditurit nga pandemia, duke bërë që shumë biznese të shuhen dhe shumë punëtorë të humbasin vendet e punës.