Pas viteve të tëra pritjeje, mbi 10 mijë banorë të 12 fshatrave të zonës së mbivadës, si quhet ndryshe pjesa lindore e Komunës së Istogut, brenda një viti e gjysmë do të bëhen me ujë të pijshëm nga ujësjellësi.

Ky projekt në vlerë prej 5 milionë eurosh financohet me mjetet e siguruara nga një kredi e butë pa interes nga marrëveshja e arritur për kredi ndërmjet Republikës së Kosovës dhe Republikës së Austrisë për lejimin e kredive të buta për institucionet e Kosovës në kuadër të programit “soft loan”, shkruan sot Koha Ditore.

Nga kjo marrëveshje kjo komunë ka përfituar mbi 5 milionë euro për këtë projekti për ndërtimin e sistemit të ujësjellësit dhe rinovimin e një rrjeti të vjetër ekzistues në një pjesë të asaj ane të Istogut.

Komuna e Istogut kishte përfunduar të gjitha obligimet ligjore në gusht të vitit 2017 për të hyrë në këtë kredi për të cilën Komuna e Istogut nuk ka obligime financiare ndaj kredisë, pasi Ministria e Financave i merr të gjitha përsipër.