Rreziku nga dhuna e ripërtërirë dhe jostabilitetit politik në Ballkan është në rritje.

Me këtë konstatim nis analiza e ekspertit amerikan Daniel Serwer, drejtor akademik për menaxhim të konfliktit në shkollën për studime të avancuara ndërkombëtare të universitetit “John Hopkins”, shkruan sot Koha Ditore.

“Dekada e progresit në pajtimin dhe rimëkëmbjen ekonomike pas konfliktit, pas intervenimeve të SHBA-së në vitet 1990, ka ngecur dhe tani në disa fusha madje ka kthim prapa”, shkruan Serwer në analizë, e publikuar nga Këshilli për Marrëdhënie të Jashtme, organizatë e renomuar amerikane.

Sipas analizës, marrëveshjet ndërkombëtare që e kanë sjellë paqen në rajonin e Ballkanit, bazuar në parimin se kufijtë ekzistues nuk duhet të lëvizin për të akomoduar dallimet etnike, po zihen dhe mund të zhbëhen me pasoja të padëshiruara edhe për Shtetet e Bashkuara.