Ministria e Punëve të Jashtme ka dhënë një tender në vlerë të mbi 43 mijë eurove për pajisje të Teknologjisë Informative. Sipas përshkrimit, me këto para do të blihen llaptopë, PC dhe Mobile Workstation.

Nuk kanë kaluar më shumë se dy javë që kur Ministria e Punëve të Jashtme dhe Diasporës e udhëhequr nga Donika Gërvalla, ka shpenzuar 5 mijë e 760 euro për blerjen e telefonave celularë dhe smart TV.

Por, ky shpenzim duket se nuk i ka mjaftuar.

Shpenzimin e parave në luks e blerje të pajisjeve teknologjike e ka vazhduar edhe më tej, shkruan Demokracia.com.

Gjatë ditës së djeshme është dhënë një tender që kap shumën e mbi 43 mijë eurove për pajisje të teknologjisë informative.

“Furnizim me pajisje të Teknologjisë Informative. Vlera e përgjithshme e kontratës 43,795.00 euro. Data e dhënies së kontratës 04.04.2023. Data e planifikuar e nënshkrimit të kontratës 05.04.2023. Numri i tenderëve të pranuar: 3. Grup i Operatorëve Ekonomik TECH VISION SH.P.K.; Mehmet Sahitolli B.I.; Nita Macula B.I”, thuhet në njoftimin e shpallur.

Në dosjen e tenderit është treguar se me 43 mijë euro do të blihen 37 produkte të ndryshme, si llaptopë, PC dhe Mobile Workstation.

“Brand Name All in One PC-Model IV Copë 20. Brand Name Llaptop- Model I cope 7. Brand Name Mobile Workstation – Model II, copë 10”.

Ditë më parë, është raportuar se Ministria e Punëve të Jashtme dhe Diasporës ka shpenzuar 5 mijë e 760 euro, para të taksapaguesve kosovarë për blerjen e telefonave celularë dhe smart TV.

Zyra e prokurimit e Ministrisë së Punëve të Jashtme dhe Diasporës të hënën ka bërë njoftim për kontratë për “Furnizim me Smart TV dhe telefona celular”.

Siç bëhet e ditur në kontratën e publikuar në KRPP, ministria e udhëhequr nga Donika Gërvalla ka paraparë blerjen e 4 telefonave celularë dhe 3 smart TV.