Deputetja e Lidhjes Demokratike të Kosovës, Hykmete Bajrami, ka adresuar një varg kritikash në adresë të ministrit të Financave, Punës dhe Transfereve, Hekuran Murati, raporton Ekonomia Online.

Bajrami tha se të hyrat financiare janë rritur për shkak të inflacionit.

“Nëse një produkt ka kushtuar një euro dhe TVSh-ja është 18 për qind, atëherë shteti i inkasuar 18 cent dhe nëse produkti është rritur në 1.50, atëherë i keni inkasuar 27 cent dhe arsyeja e rritjes së të hyrave është inflacioni dhe kjo i bie që në kurriz të qytetarëve”.

E pas kritikave të Bajramit, reagoi deputetja e Lëvizjes Vetëvendosje, Mirlinda Tishukaj-Sadriu.

Ajo tha se për shkak të neglizhencës, Vitia është lënë pa u kyçur në autostradë. Dhe sipas saj, kyçjen po e bën kjo Qeveri. 

“Kyçja e Vitisë në autostradë nuk është bërë për 12 vite dhe është lënë për shkak të 2 milionë eurove anash. Është pikërisht LDK që Ligjin për Çmimin për Tavan e ka dërguar në Kushtetuese dhe pikërisht një kryetar komune nga PDK e ka dërguar në Gjykatë Kushtetuese Ligjin për Tatimin në Pronë”, tha ajo.

E deputeti i Partisë Demokratike të Kosovës, Hajdar Beqa, tha se gjetjet e vitit 2021 me atë të vitit 2022 janë të njëjta. Ai si shembull e mori pagesat e qytetarëve serbë të punësuar në bazë të Marrëveshjes së Brukselit, të cilët paguhen pa shkuar në punë.

Kurse Murati, tha se ka përmirësim ekonomik në vend, sipas opinionit të ZKA-së për pasqyrat e menaxhimit vjetor.

“Kemi përmirësim të vazhdueshëm vit pas viti, që është konfirmuar edhe nga Zyra Kombëtare e Audimit, e që të kaluarën nuk është përdorur shkalla e njëjtë e vlerësimit sa i përket opinionit përfundimtar të pasqyrave vjetore”.

Ai tha se planifikojnë organizimin e një takimi në fund të vitit në mënyrë që të shihet zbatimin e rekomandimeve nga auditimet e Zyrës Kombëtare të Auditimit.

LEXONI EDHE:

Spanca: 129 punonjës të komunitetit serb janë paguar 800 mijë € pa shkuar në punë fare