Pas Prishtinës, Partia Demokratike e Kosovës sonte ka hapur procesin zgjedhor në Podujevë.

“Sot nisëm rrugëtimin për zgjedhjet e brendshme të PDK-së…për të mirën e partisë dhe të mirën e Kosovës”, theksoi kryetari i Partisë Demokratike të Kosovës, Kadri Veseli në hapjen e Konventës zgjedhore të degës së PDK-së në Podujevë,

“Jam në Llap, vend nga i cili vijnë shumë burra të mëdhenj të Kombit, intelektualë të shquar të Podujevës dhe më gjerë”, theksoi kryetari Veseli, për t’i dhënë mbështetje të fuqishme Dekades së Re dhe PDK-së si forcë e ndryshimit të Podujevës.

“Me unitet dhe përkrahje ndaj njëri-tjetrit, duke i hapur rrugën të rinjve, për ta forcuar PDK-në, do ta zhvillojmë edhe shtetin tonë”.

“Partia Demokratike e Kosovë, sa herë ka qenë në nivel të përgjegjësive shtetërore edhe Kosova ka qenë mirë, e në Podujevë me Dekadën e Re ajo do të jetë e hapur për kuadrot e reja që i ka Llapi e që do të jenë promotorë të ndryshimit. Këtë ndër vite po e kërkon jo vetem ky regjion por e tërë Kosova”, ka thënë Veseli.