Ministri i Bujqësisë, Pylltarisë dhe Zhvillimit Rural, Faton Peci, ka njoftuar se gjatë vitit 2024 kanë rritur shumën e subvencionimit për bujqësinë organike, për buallicat dhe bagëtitë e imëta, raporton Ekonomia Online.

Shuma e subvencionimit për buallica qumështore nga 90 euro për krye, do të dyfishohet në 180 euro.

“Si synim i agjendës së gjelbër dhe angazhimeve tona në reformë në politika dhe legjislacion do të vazhdojmë me rritjen e përkrahjes për bujqësinë organike. Sipërfaqet e deritanishme që kanë qenë nga 50 euro për hektar do të rrisim nga 50 në 100, ndërsa këtë vit me Programin e vitit 2024 do ta rrisim nga 100 euro në 250 euro për hektar”, tha Peci.

Mes tjerash, do të subvencionohen dhe 5 bimë aromatike, të cilat kanë shënuar rritje të eksportit.

“E gjitha puna, mundi e djersa e fermerëve do të realizohen të gjitha pagesat sikurse kanë qenë vitet 2022 dhe2023. Ne besojmë që puna angazhimi i mirë dhe transparenca që na ka shoqëruar dhe meritokracia në dy vitet e fundit do të vazhdojë më një përkrahje edhe më cilësore edhe për vitin 2024”, ka deklaruar Peci.

Çdo dhi do të subvencionohet me 30 euro, ndërsa mështjerrat me 50 euro.