Në tre muajt e parë të këtij viti është rritur numri i vullnetarëve për të dhuruar në Qendrën e Transfuzionit të Gjakut në Prishtinë, ndërsa gjatë muajit të Ramazanit ka rënë interesimi, raporton Ekonomia Online.

Në një intervistë për Ekonomia Online, Safete Maliqi- Qorrmemeti, shefe e Njësisë së Dhurimit te Gjakut, tha se është rritur numri për 1 000 dhurues më tepër, krahasuar me vitin e kaluar.

“Në bazë të raporteve që përcjellim vazhdimisht shohim se raporti me vitin e kaluar të tre mujorit të parë të vitit të kaluar dhe tre mujorit të këtij vitit numri i dhurimit të gjakut është rritur në krahasim me vitin e kaluar për 1 000 dhurues më tepër. Përveç pacientëve që trajtohen me Covid-19 ne kemi edhe numër të madh të shtrirëve nëpër klinikat tona të cilët trajtohen dhe si terapi për mjekim e kanë gjakun dhe produktet e gjakut. Klinikat që bëjnë kërkesa për gjak janë klinika e Hematologjisë, Kirurgjisë, Gjinekologjisë”.

“Në kohë Ramazani numri i dhurimit është më i vogël për shkak se njerëzit hezitojnë për të ardhur për të dhuruar gjak”.

Tutje,  Maliqi- Qorrmemeti thotë se vazhdimisht kanë mungesë të grupeve të gjakut.

“Mungesa kemi vazhdimisht të grupeve të gjakut mirëpo ato grupe të cilat na mungojnë në gjithmonë i kompensojmë duke i ftuar dhuruesit vullnetar të cilët janë të gatshëm çdo herë për të ardhur për të dhuruar gjak”.

Më tej, ajo u bën thirrje që të gjithë që kanë kaluar përballjen me virusin Covid-19 të paraqiten në këtë Qendrën për të dhuruar gjak.

“Njerëzit që e kanë kaluar Covidin e kanë përjetuar një sfidë e tmerrshme për të gjithë dhe ata janë të gatshëm për të ndihmuar të tjerët me Covid-19 dhe në çdo kohë vijnë dhurojnë gjak. Të gjithë ata persona që kanë kaluar Covidin dhe nuk marrin terapi dhe nuk kanë simptoma mund të paraqiten në Qendrën e Transfuzionit të Gjakut për të dhuruar plazmën e tyre”.

“Personat që paraqiten në transfuzionin e gjakut janë ata të cilët e kanë kaluar Covidin dhe personat vullnetar që dhurojnë vazhdimisht gjak. Dhe personat që kanë kaluar Covidin duhet të posedojnë një dokument dhe ne e marrim si dhurues”.