Dje, në ditën e fundit të dëgjimeve buxhetore me qytetarë për hartimin e buxhetit të vitit 2020 dhe planifikimet e hershme buxhetore 2021-2022, i pari i Ferizajt, Agim Aliu bashkë me drejtorin e Infrastrukturës, Arbër Bytyqi dhe atë të Arsimit, Afrim Llabjani në shkollën e fshatit Surqinë, takuan banorët e fshatrave Surqinë, Cërnillë, Prelez i Muhaxherëve, Mirash, Tërrn, Luboc dhe Bablak, kurse në ndalesën e dytë, takuan banorët e fshatrave Muhoc, Prelez i Jerlive, Saraishtë dhe Talinoc i Jerlive.

Aty, Kryetari i Ferizajt, Agim Aliu i bëri të ditur të pranishmëve mundësitë buxhetore të Komunës së Ferizajt për t’i përfshirë kërkesat e banorëve në investime, duke theksuar se nga 9 milionë euro sa është vlera e fondit të investimeve kapitale, vetëm 3 prej tyre mund të përdoren për planifikimet e reja, paçka se vlera e 6 milionë eurove është detyrim kontraktual.

Në anën tjetër, banorët e këtyre grupe fshatrash patën kryesisht kërkesa të njëllojta dhe shqetësime të njëllojta poashtu. Fokusi i kërkesave të tyre kishte të bënte me rregullimin e infrastrukturës rrugore dhe asaj nëntokësore, krijimin e hapësirave të reja rekreative-sportive, mirëmbajtjen e hapësirave publike si dhe investimet në objekte shkollore dhe anekse të tjera.

Kryetari i Komunës, Agim Aliu duke i dhënë përgjigje kërkesave të banorëve, njëlloj vepruan edhe drejtorët komunal, tha se mundësitë buxhetore janë të kufizuara për të absorbuar të gjitha kërkesat e parashtruara, porse do të futen në planifikimet buxhetore, ato projekte që kanë nevojë të menjëhershme për ndërhyrje.