Nga 3 vjet e 6 muaj sa i ishte vendosur më herët masa e burgimit të akuzuarit L.M i cili goditi për vdekje me veturë dy gra në rrugën “B”, Gjykata e Apelit ia ka rritur dënimin në 5 vjet burgim.

Sipas njoftimit për media, Gjykata e Apelit, e ka aprovuar ankesën e Prokurorisë Themelore, kundër aktgjykimit të Gjykatës Themelore në Prishtinë, të datës 04.03.2019, në rastin e të akuzuarit L.M. për shkak të veprës penale “Rrezikim i trafikut publik” , nga neni 378 par. 9 lidhur me par. 6 dhe par. 1 të Kodit Penal të Republikës së Kosovës.

Në kumtesë thuhet se aktgjykimi i gjykatës së shkallës së parë është ndryshuar vetëm sa i përket vendimit mbi dënim, ashtu që nga 3 vjet e 6 muaj burgim, të akuzuarit dënimi i është rritur në 5 vjet.

“Sipas vlerësimit të kësaj gjykate, rrethanat e konstatuara dhe të vlerësuara nga gjykata e shkallës së parë nuk justifikojnë shqiptimin e dënimit më burg në kohëzgjatje prej 3 vite e 6 muajve, si të mjaftueshëm për arritjen e qëllimit të dënimit, për veprën penale në fjalë, në të cilën kanë humbur jetën dy persona F.R. 23 vjeçare dhe L.A. 30 vjeçare, ngase nuk është në proporcion me intensitetin e të mirës së mbrojtur, e as me shkallën e përgjegjësisë penale të akuzuarit si ekzekutor”, thuhet në njoftim.