Drejtori i zyrës për Kosovë në Serbi, Petar Petkoviq, ka folur pas miratimit të Deklaratës për Personat e Zhdukur.

Siç raportojnë mediat në Serbi, ai ka thënë se një letër e nënshkruar nga presidenti i Serbisë, Aleksandar Vuçiq e cila mbron shtetin e Serbisë, i ishte bashkangjitur Deklaratës për Personat e Zhdukur.

“Është miratuar teksti i deklaratës për personat e zhdukur, për të cilin paraprakisht është rënë dakord në nivel teknik. E rëndësishme është se para miratimit të tekstit të deklaratës është bashkangjitur edhe një deklaratë e nënshkruar nga presidenti Aleksandar Vuçiq, ku janë sqaruar çështje të rëndësishme në lidhje me termin e përmendur në Deklaratën për Personat e Zhdukur. Kjo deklaratë konfirmon se ne kemi mbrojtur interesat e shtetit të Serbisë kur është fjala për këtë çështje”, tha Petkoviqi.

Tutje, ai theksoi se shteti i Serbisë për më shumë se dy vjet ka insistuar në miratimin e kësaj deklarate.

Ndërkaq, shtoi se Kosova ka qenë ajo që gjatë gjithë kohës ka penguar dhe nuk dëshiron që ne të arrijmë marrëveshje sepse insiston në termin ‘enforced disappearance’, që është konstrukt juridik, pra termi i përcaktuar në pikën 2 të Konventës Ndërkombëtare për zhdukjen e dhunshme, dhe qëllimisht kanë insistuar në këtë term në mënyrë që të mund t’i referohen atij dhe kanë kërkuar përgjegjësi nga Beogradi kur bëhet fjalë për zhdukjen e dhunshme. Ne nuk ramë dakord me atë term. Kjo është nënvizuar qartë në këtë deklaratë. Ne tashmë jemi pajtuar dhe kemi rënë dakord dhe ajo që ka hyrë në tekstin e deklaratës është termi ‘i zhdukur nën detyrim’. Ky nuk është një konstrukt ligjor dhe nuk përfshin asnjë përgjegjësi të shtetit serb në kuptimin juridik, por vetëm tregon rrethanat në të cilat një person apo person i caktuar është zhdukur”, ka theksuar Petkoviqi.