Kosova nuk arriti të kualifikohej në Kampionatin Evropian përmes fazës kualifikuese, meqë pas humbjes nga Republika Çeke i humbi gjasat matematikore për t’u kualifikuar nga Grupi A.

Mirëpo, gjasat për kualifikim akoma mbesin të hapura. Nga 24 përfaqësueset që do të jenë në ‘Euro 2020’, katër prej tyre do të zgjidhen përmes barazhit në Ligën e Kombeve.

Secila ligë (A, B, C, D) do ta ketë rrugëtimin e vet kualifikues. Fituesit e grupeve (në rastin tonë, Kosova si fituese e Grupit 3 në Ligën D) do të përballen me njëri-tjetrin dhe në fund do të caktohet fituesi i ligës (në rastin tonë i Ligës D) që do të sigurojë vizën për në Kampionatin e ardhshëm Botëror.

(Foto: Thomas Eisenhuth/Getty Images/Guliver)

Fituesit e grupeve në Ligën D janë: Gjeorgjia me 16 pikë (Grupi 1), Bjellorusia me 14 pikë (Grupi 2), Kosova me 14 pikë (Grupi 3) dhe Maqedonia e Veriut me 15 pikë (Grupi 4).

Në vazhdim do të zhvillohen dy ndeshje gjysmëfinale. Gjeorgjia ndaj Bjellorusisë dhe Maqedonia e Veriut kundër Kosovës. Nikoqirë të ndeshjeve gjysmëfinale janë skuadrat me renditje më të mirë. Pra, Gjeorgjia luan si vendas kundër Bjellorusisë, ndërsa Maqedonia e Veriut e pret Kosovën.

---

---

Finalja do të zhvillohet ndërmjet fituesit të Gjysmëfinales 1 dhe fituesit të Gjysmëfinales 2, ndërsa se cila përfaqësuese do të jetë nikoqire do të caktohet përmes shortit.

Kampionati Evropian, ‘Euro 2020’, do të fillojë me ndeshjen e parë në Stadio Olimpico të Romës më 12 qershor 2020. Finalja e madhe do të zhvillohet më 12 korrik 2020 në Wembley Stadium të Londrës. /Telegrafi/