Zyra e Presidentes së Kosovës, Vjosa Osmani, i ka reaguar edhe Asociacionit të Gazetarëve të Kosovës (AGK), duke e këshilluar që vend se “të na tregojë rrugën të cilën duhet ndjekur për ato që i quan ‘pakënaqësi'”, duhet të tregojë nëse kjo mënyrë raportimi siç bën disa portale është në përputhje me standardin profesional.

“Do të ishte tejet korrekte që AGK-ja në këtë reagim së paku në një pasus të apelonte për respektim të standardeve profesionale gjatë raportimit, jo vetëm në këtë rast. Kjo çfarë ndodhi sot nuk paraqet raportim, por fushatë me qëllim denigrimi të figurës së Presidentes dhe familjes së saj të ngushtë, e cila, siç po dëshmohet, është duke nxitur dhunë e urrejtje”, thuhet në reagimin e Presidencës.

Zyra e Presidentes vlerëson se raportimi në disa medie (ku tregohet lidhja familjare e bashkëshortit të saj me të vrarin në Ferizaj, i dyshuar për pedofili), nuk është as etik e as profesional.

Në fund, Osmani mohon se i ka krahasuar mediet e Kosovës me ato të Serbisë.

“Presidentja askund nuk i ka akuzuar mediat se punojnë për Serbinë, por ka thënë se akuza të ngjashme të fabrikuara kanë publikuar edhe mediat e Serbisë”, thuhet aty.

REAGIMI I PLOTË:

Asociacioni i Gazetarëve të Kosovës, përpara se të na tregojë rrugën të cilën duhet ndjekur për ato që i quan “pakënaqësi”, duhet të tregojë nëse kjo mënyrë raportimi siç bën disa portale është në përputhje me standardin profesional.

Siç konfirmon edhe vetë AGK-ja, “është punë e medieve që, duke respektuar Kodin e etikës, sidomos për ngjarje tragjike, të bëjnë punën e tyre duke ofruar fakte e dëshmi për rrethanat e ngjarjes”.
Në rastin konkret, reagimi i Presidentes vjen pikërisht si rezultati i cenimit nga e drejta për informim të dejtë, të saktë dhe me fakte të konfirmuara. Kjo ngase, në këtë rast kemi të bëjmë me shkelje të standardit profesional, duke e implikuar Presidenten qëllimshëm në një situatë, e cila në asnjë mënyrë nuk ndërlidhet me të.

Do të ishte tejet korrekte që AGK-ja në këtë reagim së paku në një pasus të apelonte për respektim të standardeve profesionale gjatë raportimit, jo vetëm në këtë rast. Kjo çfarë ndodhi sot nuk paraqet raportim, por fushatë me qëllim denigrimi të figurës së Presidentes dhe familjes së saj të ngushtë, e cila, siç po dëshmohet, është duke nxitur dhunë e urrejtje.

Ky “raportim”, nuk është as etik e as profesional.

Presidentja në reagimin e saj publik ka bërë thirrje për hetim të plotë të rrethanave që thuhet se kanë shpjerë deri te vrasja. Ajo në asnjë moment, nuk i jep epilog rastit, por kërkon hetim të plotë dhe veprim me prioritet të organeve të drejtësisë. Por, Presidentja kërkon po ashtu që të hetohen motivet e ulëta që shpien tek implikimi i saj, duke e akuzuar madje edhe për ndikim në sistemin e drejtësisë së Serbisë, e rrjedhimisht duke e akuzuar për parandalim të drejtësisë për rrethana që ajo kurrë nuk ka pasur njohuri, e aq më pak ndonjë lidhje me to. Secili gazetar dhe e gjithë AGK-ja e dinë shumë mirë se Presidentja kurrë nuk ka ndërhyrë në sistemin e drejtësisë të Kosovës, e lëre më atë të Serbisë.

Dhe në fund, Presidentja askund nuk i ka akuzuar mediat se punojnë për Serbinë, por ka thënë se akuza të ngjashme të fabrikuara kanë publikuar edhe mediat e Serbisë. Kjo gjë faktohet lehtë, sepse të gjitha janë publike.

I takon AGK-së, të ndihmojë në mbrojtjen e standardit profesional të raportimit, sepse vetëm në këtë mënyrë ka kuptim fjala e lirë dhe e drejta për raportim. “Gazetaria”, që nxit urrejtje e prodhon shpifje është në dëm e jo në dobi të gazetarisë.