Prokuroria Themelore në Prishtinë ka kërkuar nga gjykata caktimin e masës së paraburgimit ndaj ish-prokurorit Ali Rexha.

Rexha dyshohet se të mërkurën ka kanosur ish-kolegun e tij, prokurorin në Zyrën e Kryeprokurorit të Shtetit, Lulzim Sulejmani.

Ndaj ish-prokurorit Rexha, Prokuroria Themelore në Prishtinë, e cila është duke e trajtuar rastin, ka kërkuar nga gjykata që të caktojë masën e paraburgimit prej një muaji ndaj të dyshuarit.

“Departamenti i Përgjithshëm, ka paraqitur një (1) kërkesë për caktimin e masës së paraburgimit ndaj një (1) personi, për shkak të dyshimit se i njëjti ka kryer veprën penale ‘Kanosja’ (ndaj personit zyrtar)”, ka thënë Prokuroria e Shtetit në raportin 24-orësh, raporton Paparaci.

Paparaci, raportoi ekskluzivisht të mërkurën për kanosjen e prokurorit Lulzim Sulejmani.

Për këtë rast kanë reaguar edhe nga Këshilli Prokurorial i Kosovës të cilët e kanë dënuar kërcënimin ndaj prokurorit Sylejmani.

Sipas KPK-së, këto kërcënime serioze ndaj prokurorit Sulejmani vijnë si rrjedhojë e angazhimeve të prokurorit në kuadër të aktiviteteve të tij në proceset disiplinore, të realizuara kohë më parë, ndaj ish-prokurorit special, Ali Rexha.

“Këshilli Prokurorial qëndron fuqishëm në përkrahje të prokurorit Lulzim Sulejmani dhe ofron mbështetje të plotë në punën e tij gjatë ushtrimit të funksionit si Prokuror i Shtetit”.