Nga korriku i vitit 2018, kur ish-prokurori special, Elez Blakaj, ka dorëzuar aktakuzën për” veteranët” tek ish-kryeprokurori Reshat Millaku, nuk ka pasur njoftim për ngritjen të asnjë aktakuze tjetër të korrupsionit të profilit të lartë, shkruan sot Koha Ditore.

Prej atëherë kanë kaluar 344 ditë. Të vetmet njoftime të Prokurorisë Speciale, që ua ka dërguar medieve, janë për aktakuza që kanë të bëjnë me krime lufte, mashtrim e organizim të skemave piramidale, porse të akuzuarit nuk i takojnë profilit të lartë.

Gazeta ka kërkuar qe pesë ditë përgjigje nga Prokuroria Speciale për numrin e aktakuzave të korrupsionit të profilit të lartë të ngritura vitin e fundit, por ata nuk kanë kthyer përgjigje.

Për dallim nga ky vit, vitin e kaluar ka pasur disa aktakuza të ngritura për korrupsion të profilit të lartë. “Veteranët”, “Pronto”; “Sekseri” janë vetëm tri nga aktakuzat që ishin ngritur një vit më parë e që kanë përfunduar deri tash procedimin në gjykatë ose janë në trajtim e sipër.