Prokurorja e Përgjithshme e Ukrainës ka akuzuar forcat ruse për përdorimin e përdhunimit si një taktikë lufte dhe e përshkroi Putinin si “kriminelin kryesor të luftës të shekullit të 21-të”.

Duke vizituar qytetin e shkatërruar të Irpin pranë Kievit, Iryna Venediktova, tha se Ukraina po mblidhte informacion mbi akuzat për përdhunim, torturë dhe krime të tjera të dyshuara lufte nga trupat e Moskës, shkruan Aljazeera, transmeton Klankosova.tv.

E pyetur nëse përdhunimi ishte një strategji e qëllimshme ruse në luftë, ajo tha në një konferencë shtypi se ishte “e sigurt” se ishte një “strategji” që synonte të trembte civilët ukrainas dhe të detyronte vendin të kapitullonte.

Ajo nuk dha detaje specifike për akuzat për përdhunim.

Rusia ka mohuar vazhdimisht se ka shënjestruar civilët dhe ka hedhur poshtë akuzat se forcat e saj kanë kryer krime lufte.