Ai është një futbollist me emrin Ali Mohamed. Është i krishterë nga Nigeria, por për shkak se emri i tij tingëllon si mysliman, kjo mjafton për disa tifozë të futbollit që të kërkojnë t’i ndërrohet emri.

Mohamed është lojtar i ri i skuadrës Beitar Jerusalem, një klub famëkeq në Izrael për sjelljet raciste të disa prej tifozëve në drejtim të myslimanëve, shkruan sot Koha Ditore.

Mohamed ishte shënjestër e fyerjeve raciste nga disa tifozë gjatë seancës së hapur stërvitore muajin e kaluar. Thirrjet, si “Mohamedi është i vdekur” dhe “Ali është i vdekur” janë bërë në drejtim të tij, ndërsa ai stërviste me bashkëlojtarët e rinj pasi iu bashkua skuadrës nga Maccabi Netanya.

Klubet dhe trupat qeverisëse të sportit, tradicionalisht kanë luftuar racizmin e tifozëve.

Moshe Hogeg, pronari i Beitarit, thotë se përgjigjja është e thjeshtë. Ai do të padisë tifozët, për të cilët thotë se po dëmtojnë reputacionin e klubit.