Vladimir Putin beson se udhëheqësit e Ukrainës janë çmendur plotësisht. Presidenti rus e bëri të ditur këtë vlerësim gjatë një eventi për vlerësimin e ushtarëve të dalluar me medaljen “Heronjt e Rusisë” në Kremlin.

“Ne kurrë nuk do ta bënim këtë operacion nëse ata nuk do të nisnin me shkatërrimin e Rusisë në territoret tona historike, dëbonin njerëzit dhe shpallnin rusët një grup jo autokton në Ukrainë”, u shpreh Putin.

Ai po i referohej një ligji të Ukrainës për njerëzit indigjen, të miratuar në vitin 2021, i cili njeh vetëm 3 grupe etnike si autoktone, Tatarët e Krimesë, Karaitët e Krimesë dhe hebrenjt e Krimesë, Krimçakët. Në atë event, presidenti rus nuk i kurseu parashikimet me zhdukjen e Ukrainës.

 “Ushtria jonë po vepron më shumë dhe në mënyrën e duhur në Ukrainë. Industria po rritet dhe po prodhojmë shumëfish më shumë. E di që nuk kemi ende mjaftueshëm nga gjithçka. Por atyre po u mbarojnë gjërat. Ata nuk kanë as themelet e tyre. Kur nuk ke themele, asnjë ideologji, as industri, as para… ata nuk kanë asgjë të tyre… atëherë ata nuk kanë të ardhme, por ne e kemi një të tillë”, tha Putin.