Marina ruse mund të zbulojë çdo armik dhe të nisë një “sulm të paparashikueshëm” nëse është e nevojshme, tha Presidenti Vladimir Putin të dielën, disa javë pasi një anije luftarake e Mbretërisë së Bashkuar zemëroi Moskën duke kaluar nga gadishulli i Krimesë.

“Ne jemi të aftë të zbulojmë çdo armik nënujor, mbi ujë, në ajrër dhe nëse kërkohet, të kryejmë një sulm të paparashikueshëm kundër tij,” tha Putini duke folur në një paradë të ditës së marinës në Shën Petersburg, përcjell Klankosova.tv.

Fjalët e Putinit pasojnë një incident në Detin e Zi në qershor kur Rusia tha se kishte qëlluar me të shtëna paralajmëruese dhe kishte hedhur bomba në rrugën e një anije luftarake britanike për ta përzënë atë nga ujërat e Krimesë.

Britania e mohoi rrëfimin e Rusisë për incidentin, duke thënë se besonte se të gjitha të shtënat ishin një “stërvitje me armë zjarri” e paralajmëruar nga Rusia dhe se nuk ishin hedhur bomba, raporton Reuters.

Rusia aneksoi Krimenë nga Ukraina në vitin 2014 por Britania dhe shumica e botës e njohin gadishullin e Detit të Zi si pjesë të Ukrainës, jo Rusinë.

Putini tha muajin e kaluar se Rusia mund të fundoste anijen luftarake britanike “HMS Defender”, që ajo akuzoi për hyrje të paligjshme në ujërat e saj territoriale, pa filluar Luftën e Tretë Botërore dhe tha se Shtetet e Bashkuara luajtën një rol në “provokimin”.