Pyjet e Kosovës po vazhdojnë të rrezikohen nga prerjet ilegale sikurse edhe nga zjarrëvëniet e qëllimshme, është thënë të martën në një tryezë të organizuar në Prizren.

Në këtë organizim është theksuar se dëmet që po shkaktohen nga prerjet ilegale e nga zjarrvëniet e qëllimshme janë afatgjata dhe ndikojnë negativisht në përpjekjet për mbrojtjen e mjedisit dhe të trashëgimisë natyrore.

Njëkohësisht është kërkuar që tema e mbrojtjes së mjedisit të futet si lëndë obliguese nëpër shkolla, shkruan sot Koha Ditore. Sipas komunikatës së OJQ-së “EC Ma Ndryshe”, ky aktivitet është realizuar në bashkëpunim me Klubin e Ambientit të shkollës së mesme të mjekësisë “Luciano Motroni”.

Tema e tryezës së diskutimit ka qenë “Gjendja e pyjeve dhe problemi i shpyllëzimit”.

“Kjo tryezë është organizuar me qëllim që të prezantojë gjendjen ekzistuese të pyjeve dhe të trajtojë problematikën e dëmtimit të pyjeve përmes formave të ndryshme. Në këtë diskutim është prezantuar gjendja aktuale e pyjeve, efekti zinxhiror që shkakton shpyllëzimi, trajtimi që ofrohet nga ligji për këtë çështje dhe situata në Parkun Kombëtar të Sharrit”, thuhet në njoftimin e EC-it.

Panelistë në këtë debat kanë qenë Izet Osmanaj nga Drejtoria e Bujqësisë, Alban Hyseni, ekolog dhe ligjërues në Universitetin e Prishtinës si dhe Bekim Bytyçi nga DAPK “Sharri”.