Shoqëruesi i qenve të Lady Gagas është qëlluar katër herë në gjoks mbrëmjen e së mërkurës në Los Angjelos nga dy persona të cilët me këtë rast kanë vjedhur dy nga tre qentë e saj.

Ryan Fischer 30 vjeçar ishte duke shëtitur me tre qentë, Koji, Asia dhe Gustavo kur u qëllua jashtë shtëpisë së tij në Sierra Bonita Avenue, raportojnë mediat ndërkombëtare.

Policia e ka gjetur Fishcherin me vetëdije mirëpo me probleme të mëdha në frymëmarrje. Ai është dërguar me urgjencë në spital në gjendje shumë të rëndë.

Dy nga qentë e këngëtares së famshme amerikane janë vjedhur ndërkaq i treti kishte arritur të ikte por më vonë është gjetur nga Policia.

Fischer ishte duke u kujdesur për të tre qentë derisa Gaga është duke qëndruar në Itali. Policia ka bërë të ditur se të dyshuarit që e kanë kryer këtë vepër penale janë larguar nga vendi i ngjarjes me një BMW.

Qentë francezë të Lady Gagas janë shumë të shtrenjtë. Sipas një vlerësimi, llogaritet se ata mund të kushtojnë nga 1500 deri në 10 mijë dollarë secili.