Në ambientet e Hotelit “Swiss Diamond Prishtina”, sot është mbajtur Tryeza Shkencore e organizuar nga Qendra Hulumtuese për Zhvillimin e Kosovës.

Veprimtaria e Qendrës bazohet në mendimin kritik të zgjidhjes së problemeve sipas parimeve fundamentale shkencore. Për të diskutuar për strategjitë kreative për zhvillimin e Kosovës, të ftuar në tryezë ishin ekspertë të ekonomisë dhe të fushave të tjera shkencore.

Në këtë tryezë i pranishëm ishte edhe Ideatori dhe mbështetësi financiar i kësaj Qendre, Presidenti i Aleancës Kosova e Re, z.Behgjet Pacolli.

Lideri i AKR-së, në prani të stafit akademik, ka folur për situatën aktuale zhvillimore në Kosovë dhe arsyet e katandisjes së saj në pozicionin ku gjendet aktualisht.

Si rrjedhojë e ngecjeve zhvillimore dhe një perspektive të qartë për rininë e Kosovës, i pari i

AKR-së ka folur për vështirësitë ekzistenciale me të cilat po përballet pjesa më e madhe e popullsisë së Kosovës.

Ai ka thënë se organizimi i tryezave të tilla me diskutim, shkon në interes të shoqërisë kosovare, sepse vendi ynë ka nevojë për forume në të cilat shprehen idetë dhe kreativiteti.

Pas paraqitjes së hulumtimeve në terren nga panelistët, Pacolli tha se këto janë probleme me të cilat shoqëria jonë përballet që nga përfundimi i luftës në Kosovë.

“Pa rritje ekonomike mbi 10 përqind nuk mund të krijohet punësimi. Kjo rritje ekonomike do të krijonte rreth 100 mijë vende pune”, ka thënë Pacolli. Ai ka thënë se Qeveria është ajo që do të duhej t’i krijojë mundësitë për hapjen e vendeve të reja të punës.

Numri një i AKR-së ka përmendur edhe kërkesën e tij për reduktim të administratës publike dhe rritjen e efiqiencës në punë.

“Një pjesë shumë e madhe e të hyrave në Kosovë, sot shfrytëzohet për rroga meditje dhe pagesa që dedikohen për stafin e stërngarkuar adminsitrativ të Kosovës. Ne kemi propozuar që administrata publike të reduktohet dhe të rritet efikasiteti”, ka thënë Pacolli duke shtuar se zhvillimi ekonomik i vendit është qelës i zgjidhjes së problemeve në Kosovë.

Presidenti Pacolli, ka akuzuar qeverinë e Kosovës edhe për mënyrën e mbarëvajtjes së privatizimit të ndërmarrjeve publike.

“Është dashur që privatizimi të ndodh ndryshe, nga dikush që di të udhëheqë dhe që ka mundësi ta forcojë prodhimin dhe ekonominë, e jo ta dobësojë atë. Nuk ka më keq se ta ndërtosh një institucion dhe pastaj të vie dikush dhe të thotë, se nga sot kjo është e imja dhe unë do të bëj çfarë të dua” është shprehur më tej Pacolli, duke thënë se këto gjëra janë bërë me qëllim të përfitimeve klanore. “Kjo është një e keqe të cilën ne sot e paguajmë me varfëri dhe papunësi. Në një vend ku mbi 60 përqind e popullsisë është e moshës së re,  është e turpshme që 45 përqind e tyre të bredh rrugëve, derisa askund nuk ka më shumë punë për tu bërë se sa në Kosovë”.

Pacolli ka përmendur edhe ligjin që AKR e kishte propozuar dhe kaluar në parlamentin e Kosovës, ku garantohej mbrojtja e ambientit dhe ruajtja e lumenjve e maleve. Por se kjo mbrojtje atëbotë ishte penguar nga grupe të ndryshme të interesit të cilat veprojnë në Kosovë dhe janë të lidhura me pushtetin. Lideri i AKR-së ka thënë se këto kompani të lidhura me pushtetin janë përgjegjëse për shkatërrimin e ambientit dhe mijëra hektarëve tokë në vendin tonë.

Pacolli ka kërkuar nga stafi akademik i Institutit që të vazhdojnë me identifikimin e problemeve dhe gjetjen e mënyrave efektive për t’i luftuar ato.

I pranishëm në mesin e panelistëve ishte edhe drejtori i Qendrës Humlumtuese për zhvillimin e Kosovës, z.Jahja Koka, si dhe stafi shkencor i përbërë nga anëtarët e tjerë të këtij instituti.

Si pjesëmarrës i panelit i ftuar ishte edhe eksperti i ekonomisë, z.Ibrahim Rexhepi, i cili poashtu drejtoi kritika kundrejt pushtetit dhe udhëheqësisë kosovare.

Ai foli për punësimin dhe investimet publike duke përmendur kapitalin privat si nxitës të zhvillimit ekonomik në vend.  “Qeveritë tona kanë qenë qeveri të rrugëve, pra kanë koncentruar investimet në asfalt, ka thënë Rexhepi, duke shtuar se Kosova ende ka probleme me sigurim të ujit dhe rrymës për popullatën.

Tryeza më pas ka vazhduar me diskutim mes panelistëve të cilët vazhduan punimet për nxjerrjen e konkluzioneve dhe rekomandimeve lehtësuese.

QHZhK: Ekonomia edhe më keq se para luftës

Qendra Hulumtuese për Zhvillimin e Kosovës (QHZhK) ka organizuar tryezën shkencore me titull “Strategjitë kreative për zhvillimin ekonomik të Kosovës”, me ç’rast është diskutuar për problemet dhe zgjidhjet e mundshme të tyre.

Në këtë tryezë u tha se ekziston një krizë e thellë ekonomike, ndonëse në raportet financiare e Bankës Qendrore të Kosovës dhe FMN-së nuk theksohet, ajo është evidente dhe e pamohueshme.

Ekspertë ekonomikë thanë se gjendja është madje më e keqe se para luftës.

“Kapacitetet industriale, prodhuese, minierat, industria metalurgjike dhe bujqësia ishin në një shkallë më të lartë zhvillimore se tani”, tha drejtori i Qendrës Hulumtuese për Zhvillimin e Kosovës, Jahja Kokaj.

“Ekspertët ekonomikë në Kosovë konstatojnë që në kohërat e para luftës së fundit dhe para suprimimit të dhunshëm të autonomisë së atëhershme të Kosovës ekzistonte një zhvillim më i avancuar ekonomik sa sa ai i pasluftës. Kapacitetet industriale, prodhuese, minierat, industria metalurgjike dhe bujqësia ishin në një shkallë më të lartë zhvillimore se tani.”

“Ekspertët e asaj periudhe akoma mund të japin ide teorike që së bashku me kuadrin e ri shkencor duhej të realizonin sot një ekonomi edhe më të avancuar se e dikurshmja. Por fatkeqësisht, sot jemi dëshmitarë të një situate të vështirë ekonomike me shkallë të ulët zhvillimore e cila nuk garanton punësim të dëshiruar dhe zhvillim të krahasueshëm me vendet rajonale apo Evropiane. ”

“Është konstatim i ekspertëve që proceset ekonomike jo të mira që po ndodhin aktualisht do të devijojnë probleme edhe me serioze. Me ketë situatë dhe trend zhvillimor, Kosova ballafaqohet me një përkeqësim edhe më të madh ekonomik, rrjedhimisht do të gjendemi para një krize të thellë ekonomike në të ardhmen”, tha Kokaj.