Ish-shefi i grupit parlamentar të PDK-së, Adem Grabovci, është mbrojtur në heshtje në rastin e njohur si “Pronto”.

Në seancën e së hënës, pasi që trupi gjykues ka administruar si prova, propozimet e prokurores së rastit, Drita Hajdari, seanca ka vazhduar me marrjen në pyetje të të akuzuarve.

Por, Adem Grabovci, ka thënë se do të mbrohet në heshtje, ndërkohë, ka thënë se lidhur me këto akuza, në vitin 2014, ai ishte marr në pyetje nga EULEX-i, i cili mision më pas, siç ka thënë Grabovci, kishte pushuar hetimet ndaj tij.

“Në atë kohë kur jam marr në pyetje nga prokurori i EULEX kam shpreh gatishmëri që të bashkëpunoj dhe të jep kontributin tim maksimal që të zbardhet e vërteta dhe konsideroj se kjo çështje për mu është e përfunduar me vendimin dhe vlerësimin e drejtë që ka dhënë prokurori i EULEX, me datën që u cek dhe vlerësoj se këto prova ka qenë dashur me kohë të asgjësohen, duke ju referu gjithsesi ligjit që e thotë shumë të qartë se pas përfundimit të hetimeve dhe nxjerrës së vendimit për ndërprerjen e hetimeve që rezultojnë pa fakte dhe pa argumente të kryerjes së veprës penale, këto prova si çdoherë dhe çdokund, vlerësohen si të asgjësuara apo të pavlera. Sikur të kishte pasur një element të një vepre penale, do të isha përgjigjë në atë kohë. Prandaj, nuk kom çka të shtoj, por të isha i gatshëm të përballem me çdo dëshmi dhe dëshmitar dhe do të isha i nderuar po të më ofrohet mundësia dhe të përballem se cilët janë ata njerëz që ju kom bërë të padrejtë gjatë tërë jetës sime”, ka thënë Grabovci.

Në heshtje ka thënë se do të mbrohet edhe e akuzuara tjetër në këtë rast, Arbenita Pajaziti.

“Për periudhën për të cilën flitet këtu, nuk kom pas pozitë zyrtare, nuk kam qenë duke punuar në Ministrinë e Shëndetësisë dhe në asnjë institucion tjetër. Për këtë do ju propozoj një provë, vërtetim të MSH-së, se nuk kom pas pozitë zyrtare në atë kohë dhe për këtë arsye nuk kom pse të deklarohem dhe mbrohem në heshtje”, ka thënë Pajaziti.

Në seancën e së hënës, prokurorja Drita Hajdari, ka propozuar që të administrohen si prova, dokumente të ndryshme që lidhen me përzgjedhjen e kryeshefit ekzekutiv të ndërmarrjes “Trainkos” dhe “Ifrakos”, procese këto që kishin ndodhur në vitet 2011 dhe 2012.

Këto propozime, prokurorja Hajdari i ka bërë në seancën e së hënës në Gjykatën Themelore në Prishtinë, në gjykimin e rastit të njohur si “Pronto”, në të cilin akuzohen ish-deputeti i Partisë Demokratike të Kosovës, Adem Grabovci, ish-ministri i Inovacionit dhe Ndërmarrësisë, Besim Beqaj, ish-deputeti i PDK-së, Zenun Pajaziti, dhe tetë të akuzuar të tjerët.

Ata akuzohen për veprën penale “Shkelja e statusit të barabartë të shtetasve dhe banorëve të Republikës së Kosovës në bashkëkryerje”, raporton “Betimi për Drejtësi”.

Prokurorja Hajdari, ka thënë se këto prova janë pjesë e raportit policor, i propozuar që të administrohet si provë në aktakuzë.

“Në disa shkresa të këtij raporti është thirr edhe avokati mbrojtës në seancën e kaluar. Kur i kom listuar në shkesat përcjellëse këto prova nuk i kom përmend, por këto lidhen edhe me dëshmitarët që jon dëgju seancën e kaluar”, ka thënë prokurorja Hajdari.

Ajo ka përmendur më pas provat që ajo propozon që të administrohen si prova.

“Në kuadër të këtij raporti propozoj që të administrohen si provë, shkresa e Ndërmarrjes ‘Trainkos’, nr741 i datë 11.10.2016. Konkursi për pozitën e shefit ekzekutiv. Raport mbi vlerësimin, rangimin dhe krijimin e listës së ngushtë të kandidatëve në konkursin për pozitën kryeshef ekzekutiv në ‘Trainkos’, i datës 07.12.2011. Vendimi për përzgjedhjen e Ruzhdi Morinës si kryeshef i ‘Trainkos’, i datës 27.12.2011. Lista e të punësuare në ‘Trainkos’”, ka thënë prokurorja Hajdari.

Gjithashtu, ajo ka propozuar që të administrohen si prova edhe punësimet që kanë të bëjnë me ndërmarrjen publike “Infrakos”.

“1. Shkresa e ‘Infrakos’, e datës 23.09.2016. Nën 2. Konkursi për kryeshef ekzekutiv. 3. Regjistri i aplikantëve për kryeshef ekzekutiv, i datës 30.11.2011. Nën 4, raporti për vlerësim dhe rangimin dhe krijimin e listës së ngushtë të aplikantëve në konkursin për pozitën e kryeshefit ekzekutiv, i datës 19.12.2011. Nën 5, vendimi për përzgjedhjen e Agron Thaqi si kryeshef ekzekutiv i ‘Infrakos’, me 13 janar 2012 dhe nën 6, lista e të punësuarve në vitin 2011”, ka thënë prokurorja Hajdari.

Ajo ka deklaruar se arsyeja se pse i propozon këto prova është që dëshmitarët e dëgjuar në seancën e kaluar, njëri si kryesues i bordit në “Trainkos”, e tjetri në “Infrakos”, kanë dëshmuar për procedurat e përzgjedhjes së bordit dhe kryeshefit ekzekutiv në këto ndërmarrje publike.

Mirëpo, sipas saj, është parë se këtyre dëshmitarëve nuk u kujtohen datat kur janë përzgjedhur kryeshefi në ndërmarrjen “Trainkos”, e as data e zgjedhjes së kryeshefit të ndërmarrjes “Infrakos”.

“Në një moment ata thanë se bordet në ndërmarrjet e tyre ishin të kompletuara, andaj kishin fuqi ligjore për ta zgjedhur kryeshefin ekzekutiv. Bazuar në vendimin e Qeverisë së Kosovës, për anulimin e konkursit për drejtorë të Ndërmarrjeve Publike Qendrore dhe vazhdimin e mandatit të tyre, vendim ky i datës 21 dhjetor 2011, i propozuar që të administrohet si provë në aktakuzë, rezulton se pas kësaj date, nuk ka ekzistuar asnjë pengesë juridike, për përzgjedhjen e kryeshefave ekzektuivë, meqë bordeve u është vazhduar mandati dhe ata dispononin me fuqinë juridike për përzgjedhjen e kryeshefave ekzektuvë. Që të dy janë siç kam cekur më herët, në ndërmarrjen “Trainkos”, është zgjedhur kryeshefi më 27 dhjetor 2011, dhe në “Infrakos”, më 13 janar 2012, do të thotë që të dy pas 21 dhjetorit kur bordeve u është vazhduar mandati”, ka thënë prokurorja Hajdari.

Ajo ka thënë se për vërtetimin e plotë të gjendjes faktike, konsideron se këto prova duhet të administrohen.

Por, këto prova i kanë kundërshtuar mbrojtësit e të akuzuarve në këtë rast.

Mbrojtësi i Adem Grabovcit, avokati Florent Latifaj, ka thënë se nuk e din se çfarë ndikimi ka pasur klienti i tij në këto konkurse.

“Në arsyetimin se këtu u fol për dy dëshmitar se ata kanë thënë se ata kanë bo, ata kanë zgjedh, ata kanë pas të drejtë me zgjedh, Qeveria i ka rishpall konkurset, nëse ka të bëj me dëshmitar diçka tjetër, kanë bishtnu diçka, është një procedurë krejt tjetër. Sa i përket të mbrojturin tim, Adem Grabovcit, nuk e di çfarë ndikimi ka pas në Qeveri për këto konkurse. Atëherë cila është lidhmëria e këtyre provave me Adem Grabovcin. Nëse prokuroria mendon që Ademi ka pas ndonjë ndikim në kryeministrin e Kosovës, atëherë ky nuk akuzohet për ushtrim ndikimi”, ka thënë avokati Latifaj.

Kurse, mbrojtësi i Besim Beqajt, avokati Besnik Berisha, ka thënë se prokurorisë i ka “humb topi”.

“Të vetmet pyetje që i ka pas prokuroria për dëshmitarët e kaluar i ka pas “a ju kujtohet” dhe “a jeni në dijeni për vendimin e Qeverisë për anulimin e konkurseve për ndërmarrjet publike. Sot, aktakuza po kthehet për kryeshef ekzektuiv të cilat në kundërshtimin e tyre thoshte se këta nuk jon këtu për kryeshefa ekzekutiv. E drejtë fondamentale për dikë që akuzohet është të ketë saktësi për akuzën sepse nuk mund të mbrohet në mënyrë efikase. Për me saktësu edhe për neve, a është zoti Beqaj dhe Grabovci këtu për përzgjedhjen e kryeshefave ekzekutiv në Trainkos dhe Infrakos, apo jon këtu për shkak të anulimit të një konkursi të Qeverisë së Kosovës, për të cilin prokuroria nuk ka guxu me thirr shefin e tyre asnjëherë për anulimin e atyre konkurseve”, ka thënë Berisha.

Ndryshe, në maj të këtij viti, Gjykata e Apelit ka refuzuar ankesat e avokatëve mbrojtës, duke e lënë kështu në fuqi aktakuzën e ngritur nga Prokuroria Speciale e Republikës së Kosovës (PSRK).

Gjykata Themelore në Prishtinë, më 3 prill 2019, e kishte konfirmuar aktakuzën ndaj Adem Grabovcit, Besim Beqajt, Zenun Pajazitit dhe të tjerëve në rastin e njohur “Pronto”, pasi që kishte refuzuar kërkesën e mbrojtjes për hudhjen e aktakuzës dhe kundërshtimin e provave.

Në seancën që ishte mbajtur më 4 shkurt 2019, mbrojtja e të akuzuarve Adem Grabovci, Besim Beqaj, Zenun Pajaziti dhe të tjerëve në rastin e njohur “Pronto”, e kishte kundërshtuar aktakuzën.

Kurse, në seancën fillestare të mbajtur më 15 nëntor 2018, të akuzuarit ishin deklaruar të pafajshëm.

Në mesin e 11 të akuzuarve janë, ish-shefi i grupit parlamentar të PDK-së, Adem Grabovci, ish-ministri i Inovacionit dhe Ndërmarrësisë, Besim Beqaj, deputeti aktual i PDK-së, Zenun Pajaziti, ish-kryesuesi i Kuvendit të Komunës së Prizrenit, Nijazi Kryeziu, ish-shefja e Njësisë për furnizim në Ministrinë e Shëndetësisë, Arbenita Pajaziti, ish-sekretari i Ministrisë së Punëve të Brendshme, Ilhami Gashi, ish-zëvendësministri i Punës dhe Mirëqenies Sociale, Fatmir Shurdhaj, ish-këshilltari politik në MPB, Sedat Gashi, Ismet Neziraj, Xhavit Dakaj dhe Rexhë Abazi.

Ata akuzohen për kryerjen e veprës penale “Shkelja e statusit të barabartë të shtetasve dhe banorëve të Republikës së Kosovës në bashkëkryerje”, nga neni 193 paragrafi 4 lidhur me paragrafin 1 të KPRK-së, lidhur me nenin 31 të KPRK-së, prej të cilave disa prej veprave kanë mbetur në tentativë.

Sipas aktakuzës, të pandehurit kanë keqpërdorur pozitat e tyre zyrtare duke bashkëpunuar në mes vete për dhënien e privilegjeve dhe përparësive kundërligjshme personave të cilët kanë konkurruar në funksione të rëndësishme, siç janë: drejtor për Ndërmarrjet publike qendrore, Kryeshef Ekzekutiv i Agjencisë së Regjistrimit në Ministrinë e Punëve të Brendshme, Kryeshef i Agjencisë për produkte medicinale dhe Koordinator i Qendrës së Regjistrimit Civil në Komunën e Klinës, duke mohuar dhe kufizuar liritë dhe të drejtat e kandidatëve të tjerë, të garantuara me ligj. Në aktakuzë është trajtuar çështja penale e punësimeve dhe ndarjes së posteve, të bazuara në përkatësinë partiake dhe raporte personale, për të cilin problem për një kohë të gjatë alarmojnë qytetarët e Kosovës, Agjencitë për zbatimin e ligjit si dhe mediat dhe shoqëria civile.