Të mërkurën, pritet të vazhdojë gjykimi i rastit të njohur si “Veteranët”, në të cilin pritet të dëshmojë ish-kryeministri i Kosovës, Ramush Haradinaj.

Në këtë rast, për keqpërdorim të pozitës apo autoritetit zyrtar, akuzohen ish-kryeministri i Kosovës, Agim Çeku, ish-ministri i Mbrojtjes, Rrustem Berisha, deputeti Shkumbin Demalijaj, si dhe nëntë persona të tjerë.

Ata akuzohen për kohën sa ishin pjesë Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së UÇK-së, raporton “Betimi për Drejtësi”.

Propozimin për dëgjimin e Haradinajt, si dëshmitar në këtë proces gjyqësor e kishte dhënë mbrojtësi i të akuzuarit Shkumbin Demalijaj, avokati Arianit Koci, në seancën e 7 shkurtit të këtij viti.

Haradinaj, ishte paraparë që të dëshmonte në seancën e 21 shkurtit, por e cila ishte anuluar për shkaqe shëndetësore të gjykatëses Nushe Kuka-Mekaj, ndërsa Haradinaj nuk kishte marrë pjesë në seancën e 24 shkurtit, për të cilën seancë Kuka-Mekaj, kishte thënë se nuk ka prova se dëshmitari kishte pranuar ftesën.

Ndërsa, avokati Koci, që kishte propozuar dëgjimin e Haradinajt, në seancën e 24 shkurtit kishte thënë se pas kontaktit me Haradinajn, ishte njoftuar se ai do të merrte pjesë në seancën e radhës, e cila ishte caktuar më 4 mars 2020.

“Betimi për Drejtësi”, ka kontaktuar me avokatin Koci, i cili ka thënë se vetëm se mbetet pranë njoftimit që ia kishte bërë gjykatës në seancën e 24 shkurtit, se Haradniaj është zotuar se do të merr pjesë në seancën e radhës.

Ndryshe, në seancën e 24 shkurtit, në cilësi të dëshmitarëve ishin dëgjuar Hisen Berisha dhe Fazli Rugova.

Por, në këtë gjykim, akoma vazhdon të jetë në fuqi vendimi i trupit gjykues për mos publikimin e dëshmive të dëshmitarëve deri në përfundimin e të gjitha dëshmive.

Gjykata Themelore në Prishtinë, më 19 qershor të vitit 2019, e kishte konfirmuar aktakuzën, ndërsa këtë vendim e kishte konfirmuar edhe Gjykata e Apelit në gushtin e këtij viti.

Me aktakuzën e PSRK-së, po ashtu ishte kërkuar që Gjykata Themelore në Prishtinë, që të urdhërohet Ministria e Punës dhe Mirëqenies Sociale (MPMS), që të pezullonte pagesën e pensioneve për 19.500 veteranë, deri në përfundimin e procesit gjyqësor.

Por, më 1 prill 2019, gjykata e kishte refuzuar këtë kërkesë me arsyetimin se propozimi për masën e përkohshme nuk është ndaj të akuzuarve, por ndaj MPMS-së, si palë e tretë.

Sipas aktakuzës së përgatitur nga ish-prokurori special, Elez Blakaj, personat e përfshirë akuzohen se prej vitit 2011 deri në vitin 2017, duke vepruar si anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së Ushtrisë Çlirimtare të Kosovës, kanë shfrytëzuar detyrën dhe autoritetin zyrtar, duke tejkaluar kompetencat me dashje dhe duke mos i përmbushur detyrat zyrtare, me qëllim që të përfitojnë personat e tjerë në mënyrë të kundërligjshme, në vazhdimësi, në dëm të Buxhetit të Republikës së Kosovës.

Në këtë aktakuzë janë të përfshirë 12 persona të cilët ngarkohen me veprën penale “keqpërdorimi i pozitës apo autoritetit zyrtar”.

Siç kishte raportuar “Betimi për Drejtësi”, listës së personave të akuzuar i prinë Agim Çeku, i pasuar nga Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj, Fadil Shurdhaj dhe Xhavit Jashari.

PSRK-ja, po ashtu i kishte propozuar kësaj gjykate që ta lëshoj masën për ndalimin  e pagesës së pensioneve të fituara në mënyrë të kundërligjshme si veteran luftëtarë të UÇK-së, deri në përfundimin e procedurës penale..

Tutje, sipas PSRK-së, nga provat e siguruara deri më tani është vërtetuar se nga pagesat e kundërligjshme për veteranët luftëtarë të UÇK-së, buxheti i Republikës së Kosovës është dëmtuar në shumë prej 68.153.533.14 euro.

Ndërsa, me aktakuzën e dorëzuar në gjykatë më 7 dhjetor 2018, pretendohet se buxheti i Republikës së Kosovës është dëmtuar në shumë prej  88.769.217.04 euro.