Një fluturim i aviotransportuesit kombëtar të Pakistanit gjatë ditës së djeshme është ulur në aeroportin ndërkombëtar “Hamid Karzai” në Kabul, duke rifilluar fluturimet ndërkombëtare në Afganistan që nga marrja e kontrollit nga talibanët muajin e kaluar.

Fluturimi solli një grup gazetarësh ndërkombëtarë në Kabul dhe u kthye me zyrtarë të Bankës Botërore dhe disa gazetarë, tha në një deklaratë shefi ekzekutiv i Aviacionit Ndërkombëtar të Pakistanit (PIA) Arshad Malik, duke e quajtur fluturimin “shumë të rëndësishëm” dhe duke shtuar se e gjithë bota po pret që ata të rivendosin lidhshmëri ajrore me Afganistanin.

Ai gjithashtu shfaqi shpresën se shërbimi i fluturimit për në Kabul do të restaurohej plotësisht së shpejti.

Qëllimi i fluturimit është të promovojë vullnetin e mirë midis Pakistanit dhe Afganistanit dhe të forcojë operacionin në bazë të simpatisë humanitare, thuhet në deklaratë, shkruan Anadolu.

Fluturimi u realizua nga një aeroplan çarter, i cili solli tre gazetarë nga Islamabadi dhe fluturoi përsëri me 65 pasagjerë, tha një zyrtar i PIA-së në Kabul.

Të dielën, administrata e përkohshme talibani risolli sigurinë dhe personelin tjetër që punonin në aeroportin e Kabulit para 31 gushtit, ditën kur forcat amerikane u larguan nga vendi.

Kur talibanët morën kontrollin e Kabulit më 15 gusht, fluturimet komerciale ndërkombëtare u ndërprenë, ndërsa forcat amerikane thuhet se dëmtuan aeroportin, duke përfshirë aeroplanët transportues kombëtarë afganë, punëtori dhe zyra, para se të tërhiqeshin plotësisht nga vendi më 31 gusht.

Pas tërheqjes së forcave amerikane, ekipet teknike të Katarit dhe Turqisë mbërritën të nesërmen për të ndihmuar në restaurimin e aeroportit në mënyrë që të mund të rihapej.​​​​​​​