Rifillimi i luftimeve mes rebelëve Huthë të Jemenit, të mbështetur nga Teherani, dhe Arabisë Saudite rrezikon të hapë një front të ri në luftën SHBA-Iran, me pasoja potencialisht të rënda për ekonominë globale, shkruan CNN.

Si arritëm deri këtu: Në fillim të këtij muaji, Huthët akuzuan Arabinë Saudite se kishte goditur aeroportin në kryeqytetin e Jemenit, Sana, nën kontrollin e Huthëve, për të penguar uljen e një avioni që transportonte një delegacion të nivelit të lartë të Huthëve, i cili po kthehej nga ceremonia mortore e Ajatollah Ali Khameneit në Iran. Qeveria e Jemenit, e mbështetur nga Arabia Saudite, tha se forcat e saj kishin kryer sulmin.

Fluturimi ishte një përpjekje e Huthëve për ta thyer një kufizim disavjeçar ndaj lidhjeve ajrore të Sanas, duke rifilluar fluturimet direkte me Teheranin për herë të parë që nga koalicioni i udhëhequr nga Arabia Saudite hyri në luftë në vitin 2015.

Kjo pasqyroi “një tipar më të gjerë të strategjisë në zhvillim të Teheranit: përdorimin gjithnjë e më të koordinuar të Boshtit të Rezistencës për t’i shndërruar periudhat e përballjes në mundësi për të konsoliduar arritjet, për të riformësuar realitetet në terren dhe për të forcuar ndikimin rajonal të Iranit”, shkruan ekspertët për Jemenin, Nadwa Al-Dawsari dhe Arman Mahmoudian, të hënën për Institutin e Lindjes së Mesme në Washington.

Ky zhvillim shënoi një përshkallëzim të rrezikshëm, pasi Huthët kryesisht kishin respektuar një armëpushim joformal me Arabinë Saudite gjatë viteve të fundit. Pas sulmit, Huthët deklaruan se periudha e qetësimit kishte përfunduar dhe shpallën një “bllokadë” ndaj transportit detar të lidhur me Arabinë Saudite përmes Ngushticës Bab al-Mandab, një rrugë që ishte bërë gjithnjë e më e rëndësishme për eksportet e naftës së mbretërisë pasi Irani e mbylli praktikisht Ngushticën e Hormuzit.

Më pas, ata pretenduan se kishin goditur dy cisterna saudite. Arabia Saudite pranoi se të paktën një anije ishte goditur dhe u kundërpërgjigj me sulme ajrore ndaj objektivave të Huthëve në Hodeidah, ku ndodhet porti kryesor nën kontrollin e Huthëve.

Të hënën, pamjet satelitore të siguruara nga NASA duket se treguan një re tymi të zi që ngrihej nga zona pranë rafinerisë së Jazanit në bregdetin e Detit të Kuq të Arabisë Saudite dhe shtrihej për rreth 200 kilometra, një ditë pasi Huthët pretenduan se kishin sulmuar objektin.

Konflikti kërcënon transportin detar përmes Bab al-Mandab, një arterie jetike për tregtinë globale dhe furnizimet me energji, duke rrezikuar rritjen e çmimeve të naftës, kostove të transportit dhe inflacionit në mbarë botën.