Agjencia Evropiane e Barnave (EMA) ka filluar të analizojë vaksinën ruse anti-COVID, Sputnik V, disa muaj pasi vaksina është aprovuar së pari në Rusi dhe pasi dhjetëra shtete nëpër botë e kanë autorizuar atë, raporton agjencia AP.

Në një komunikatë të enjten, rregullatori evropian ka thënë se analiza është e bazuar në rezultatet nga studimet laboratorike dhe në hulumtimet me të rriturit, që sugjerojnë se vaksina mund të ndihmojë në mbrojtjen nga koronavirusi.

Përkundër skepticizmit që Rusia nxitoi me aprovimin e vaksinës, para se të kompletoheshin testimet e fazës së fundit, vaksina duket e sigurt dhe efikase. Sipas një studimi të publikuar në revistën Lancet, Sputnik V, është rreth 91 për qind efikase në parandalimin që njerëzit të sëmuren rëndë nga COVID-19.

EMA nuk ka caktuar ende datë se kur mund të takohen ekspertët për të vlerësuar të dhënat e Sputnik V për të vendosur më pas nëse duhet të aprovohet për përdorim nëpër shtetet e Bashkimit Evropian. Por, analiza nënkupton shpejtimin e procesit të autorizimit, që mund të zgjasë disa muaj.