Ndonëse përfundoi në pozitën e dytë stinorin e kaluar, Schalke thjesht ka qenë shokuese këtë stinor.

Skuadra nga Gelsenkircheni është duke kaluar nëpër periudhën më të keqe, qëkur ra nga Bundesliga në stinorin 1982\83. Dhe të shtunën, gjërat shkuan edhe më keq pas humbjes 4:0 në shtëpi nga Fortuna Duesseldorfi, përcjell Koha Ditore shkrimin e AP.

Trajneri u kërkoi falje tifozëve dhe kapiteni i skuadrës u detyrua të heqë shiritin e kapitenit nga disa tifozë të zemëruar që u futën në fushë.

“Ne jemi lojtarë të vegjël krahasuar me këtë klub të madh”, tha kapiteni i Schalkes, Benjamin Stambouli me lot në sy.

Ishte humbja e 13-të e Schalkes në 24 ndeshje në ligë dhe ajo erdhi pas humbjes 3:0 nga Mainzi një javë më parë.