Sekretari amerikan i Shtetit, Marco Rubio, ka thënë në një postim në X se e “dënon fuqishëm” sulmin vdekjeprurës të së dielës në Bondi Beach, në Sydney të Australisë.

“Antisemitizmi nuk ka vend në këtë botë. Lutjet tona janë me viktimat e këtij sulmi të tmerrshëm, me komunitetin hebre dhe me popullin e Australisë”, tha Rubio.

Ambasada e SHBA-së në Australi, me seli në Kanberra, gjithashtu postoi në X lidhur me sulmin terrorist, duke u shprehur “thellësisht e tronditur” nga lajmi dhe duke ofruar “ngushëllimet më të sinqerta për familjet e viktimave të këtij akti të pakuptimtë që shënjestroi komunitetin hebre në natën e parë të Hanukkahs”.

Ambasada u bëri thirrje qytetarëve amerikanë që ndodhen në Australi ta shmangin zonën e menjëhershme të Bondi Beach, të ndjekin udhëzimet e autoriteteve lokale dhe të informojnë të afërmit për gjendjen e tyre.