Sekretari amerikan i Forcave Ajrore, Frank Kendall, ka thënë se Shtetet e Bashkuara dhe Kina janë përfshirë në një garë armësh për t’i zhvilluar armët më vdekjeprurëse hipersonike në kohën kur Pekini e Uashingtoni po ndërtojnë e po testojnë gjithnjë më shumë armë të gjeneratës së ardhshme.

“Ekziston një garë armësh, jo domosdo për rritje të shifrave, por për rritje të cilësisë. Është një garë armësh që është duke u zhvilluar për goxha ca kohë. Kinezët kanë qenë shumë agresivë në këtë”, tha zyrtari i lartë amerikan për agjencinë “Reuters”, përcjell Gazeta Express.

Në tetor, komandanti i ushtrisë amerikane, Gjeneral Mark Milley, konfirmoi një test hipersonik nga Kina, për të cilin ekspertët ushtarakë thonë se duket se e shfaq krijimin e një sistemi orbitues rreth Tokës nga Pekini, të dizajnuar për t’i shmangur sistemet mbrojtëse raketore amerikane.

Armët hipersonike fluturojnë në pjesën e sipërme të atmosferës me shpejtësi mbi pesëfish më të madhe se shpejtësia e zërit ose rreth 6.200 kilometra në orë.

Kentall vuri në pah se ushtria amerikane i ka përqendruar fondet në Irak e Afganistan dhe nuk e ka pasur vëmendjen e duhur në aspektin e armëve hipersonike. “Kjo nuk do të thotë se nuk kemi bërë asgjë, por nuk kemi bërë mjaftueshëm”, tha ai.

Sekretari amerikan shpreson që të shtohen fondet me largimin e sistemeve më të vjetra e të shtrenjta për t’u mirëmbajtur në favor të sistemeve të reja, përfshirë programet për zhvillimin e armëve hipersonike.