Zëvendësministri Petrit Selimi është duke e ushtruar funksionin e koordinatorit nacional të Korporatës Sfidat e Mijëvjeçarit (MCC) për Kosovën në kundërshtim me dy vendime që Qeveria i ka marrë javën e shkuar.

Sipas tyre, i tillë funksion nuk mund të ushtrohet nga zyrtarë që kanë funksione politike.

Mbështetur në llogarinë “@MCCKosovo” në rrjetin social “Twiter”, në kapacitetin prej koordinatori nacional, Selimi bashkë me ekonomistin kryesor në Zyrën Sfidat e Mijëvjeçarit, Alban Zogaj, të martën ka zhvilluar një takim në Ambasadën e Shteteve të Bashkuara në Prishtinë.

Njoftimit i është bashkëngjitur edhe një fotografi. Detaje të tjera nuk janë dhënë.

Ka ndodhur kjo, pavarësisht se të premten e javës së shkuar Qeveria ka ndryshuar dy dokumente që ndërlidhen me pozitën e koordinatorit nacional./KD/