Kërkesa për lejimin e dy provimeve në këtë afat ishte bërë nga Parlamenti Studentor.

“Ne kërkojmë qe prilli të bëhet me dy provime. Nëse mbledhja e senatit do ishte mbajtur më herët dhe ishte shqyrtuar kërkesa që e keni pasë në sirtar atëherë kish me qenë në rregull”, tha Arjeta Bajrami, kryetarja e Parlamentit Studentor.

Tahir Arbneshi, dekan i Fakultetit të Shkencave Matematiko- Natyrore tha se nëse sot votohet për t’u lejuar këto provime është shumë vonë për ta organizuar afatin e prillit.

“Ne mundemi me bo provime sa te duash por po e dëmton cilësinë. Unë e kam pa kërkesën e keni bërë me 3 prill. Për mua është shumë vonë. Nëse doni me na qit para aktit të kryer bujrum. Unë jam kundër këtij propozimi”, tha Arbneshi.

Bujar Dugolli tha se kërkesa e Parlamentit Studentor lidhet me zgjedhjet atje.

“Parlamenti i studentëve tash i ka zgjedhjet e po duan të kallxojnë që u ndihmojnë studentet. Studenteve nuk u ndihmoni tu e shkatërru cilësinë sepse studentëve te mirë u duhen 3 provime e jo më shumë”, tha Dugolli.

Prorektori Faton Berisha propozoi që provimet në afatin e prillit të mbahen aty ku ka mundësi të organizohen.

“Për me pshtu me ftyrë dhe me qenë mirë, unë kam propozim me e bërë që provimi të mbahet nga njësitë akademike që kanë mundësi të mbajnë këto provime”, tha Berisha, raporton kallxo.com.

But Dedaj, dekan i Fakultetit Ekonomik tha se ky fakultet nuk ka mundësi të organizojë provime në afatin e prillit.

“Fakultetet që mund t’i mbajnë provimet le të deklarohen. Për fakultetin tonë është e pamundshme”, tha Dedaj.

Rekori Marjan Dema pastaj propozoi që edhe kësaj radhe të lejohet mbajtja e provimeve në afatin e prillit.

“Po propozoj që edhe kësaj radhe të ua lejojmë mbajtjen e dy provimeve nga fakultetet. Le të jetë hera e fundit”, tha Dema.

Me 19 vota për, 7 vota kundër dhe 5 abstenime u miratua propozimi për dy provime për studentët në afatin e prillit nga njësitë akademike që kanë mundësi të organizojnë këto provime.