Aleanca Kosovare e Bizneseve (AKB) dhe Ministria e Mbrojtjes kanë nënshkruar një memorandum bashkëpunimi, me të cilin parashihet që bizneset kosovare, anëtare të AKB-së por edhe të tjera, të ofrojnë produktet dhe shërbimet e tyre me çmime të ulura, për pjesëtarët e Forcës së Sigurisë së Kosovës (FSK).

Kryetari i AKB-së, Agim Shahini, në një bisedë për Ekonomia Online ka treguar se tashmë rreth 40 kompani kanë ofruar 80 mijë produkte të ndryshme me zbritje. Por numri i kompanive dhe produkteve do të vazhdojë të rritet, pasi ka interesim edhe të kompanive të tjera.

Shahini tha se kompanitë e para që kanë ofruar mbështetje i kanë zbritur në 14 për qind produktet për pjesëtarët e FSK-së.

“Kjo sado pak do t’i mbështet ushtarët gjatë blerjeve do t’i subvencionojnë kompanitë vendore këta ushtarë duke i stimuluar ata dhe të tjerët që ne të kemi një ushtri më të dinjitetshme dhe më të mirë. Prandaj aksioni për nënshkrime edhe të kompanive tjera është vazhdimësi e sipër. Mesatarisht rreth këto 40 kompani kanë ofruar 80 mijë produkte, artikuj të ndryshëm që do t’ia ofrojnë ushtrisë, por kryesisht janë produkte esenciale, produkte të përditshme por këtu nuk do të ndalemi. Ne synojmë që të rritim numrin e kompanive dhe është një interesim i madh i anëtarësisë së gjerë dhe i bizneseve të Kosovës të na bashkohen në këtë projekt tonë të përbashkët në mënyrë që ushtarët të ndiejnë veten krenarë pse janë ushtarë, por edhe ne të ndiejmë veten krenar që kemi ushtrinë”, tha Shahini.

Ai u shpreh se nuk do të ndalen me kaq. Synim sipas tij do të jetë edhe zbritja e çmimeve për pushimet në bregdetin shqiptar.

“Vlen të theksohet se ne me angazhimin tonë do të tejkalojmë edhe kufirin e Kosovës që ushtarët e Kosovës gjatë sezoneve të ndryshme kur shkojnë nëpër pika të ndryshme pushimi të kenë më lirë se sa që janë çmimet aktuale të kohës. Prandaj kjo është një mbështetje dhe një përkushtim i joni i përbashkët që ushtria jonë të jetë e respektuar jo vetëm duke u përshëndetur, por edhe duke i ofruar edhe blerje të banesave dhe shtëpive ku në disa kompani kanë zbritje të madhe për të blerë ata”, thotë ai.

Shahini tha se do të mundohen që lehtësira ushtarët të kenë edhe në sektorë të ndryshëm, si shitblerje, regjistrim nëpër universitete e shërbime shëndetësore. Për ta bërë këtë, Shahini ka kërkuar ndihmën e institucioneve.

“Ne synojmë që brenda këtij viti ky projekt të përmbyllet pothuajse mbi 80 për qind në gjithë sektorët në Republikën e Kosovës ku ushtarët tanë do të kenë shumë lehtësi në të gjithë sektorët duke përfshirë edhe në regjistrimin e fakulteteve, duke përfshirë këtu edhe në shërbime konsulente, shërbimeve juridike, shërbime në shëndetësi, e blerje me tregti, blerje të automjeteve, transport, veshmbathje, mirëmbajtje”.

“Të gjitha këto ushtarët do ta kenë, por dua që këtë aksion ta mbështesin edhe institucionet e shtetit. Duke i shtyrë edhe kompanitë e ndryshme që janë, që furnizojmë me energji elektrike ushtarët do të kenë një zbritje edhe në energji elektrike po ashtu në shërbime komunale qoftë për mirëmbajtje, qoftë për ujë të jenë pjesë e kësaj përpjekje në mënyrë që ushtarët me të vërtetë të jenë ashtu siç e meritojnë të dalluar nga të tjerët”, tha ai.