Deputeti i PDK-së, Ferat Shala, ka vizituar të martën ish-ushtarët e UÇK-së në Shoqatën e Veteranëve të UÇK-së në Drenas.

Ai ka thënë se në këtë takim i kanë uruar për përfundimin e zgjedhjeve dhe për formimin e strukturave të reja të shoqatës.

Ai ka theksuar se zgjedhjet janë dëshmi e përkushtimit të vazhdueshëm për t’i mbajtur gjallë vlerat dhe idealet për të cilat kanë luftuar.

Postimi i plotë:

Sot, bashkë me Fadilin dhe Petritin, vizituam bashkëluftëtarët në Shoqatën e Veteranëve të UÇK-së në Drenas, patëm kënaqësinë t’ju urojmë për përfundimin e zgjedhjeve dhe për formimin e strukturave të reja.

Këto zgjedhje janë dëshmi e përkushtimit të vazhdueshëm për t’i mbajtur gjallë vlerat dhe idealet për të cilat kemi luftuar, duke ruajtur gjithashtu unitetin dhe forcën që e kanë karakterizuar gjithmonë këtë shoqatë.

Nëpërmjet bashkëpunimit dhe përkushtimit të ndërsjellë, do të vazhdojmë të përkrahim njëri-tjetrin dhe të ndërtojmë një të ardhme që nderon sakrificën dhe pasuron brezat e ardhshëm me krenarinë dhe trashëgiminë e UÇK-së.